Lei min nasa vangin Kashmir Valley tlawh theih loh

Lei min nasa vangin Kashmir Valley tlawh theih loh
Kashmir phaikuam kalpawhna leh mamawh lakluhna ber, Srinagar-Jammu national highway chu ruah nasa taka surin lei a timinin a hnawh avang leh tui lian avangin a pung mek a. Mi pathum thi an awm tawh a, truck leh lirthei tam tak kawngah hian tangkhangin tuiin a chim nasa hlawm hle.
A tuar nasa ber zingah Ramban pawh a tel a. Thing tam tak tluin lirthei kal a tibuai hle a, hmun eng emaw zatah power a awm lo bawk.
Ningani khan thli na tak leh ruah tam tak a thawk thut a, hei hian sabereka khuangkaih a siam nasa hle a ni.
Udhampur-a Sateni Panchayat sarpanch thin, Parshottam Gupta chuan an awmna lai velah chhiatna a thleng nasa tak zet tih a sawi a. “Ka panchayat huam chin ka thlir kual a, thing a tlu nasa hle a. Lirthei kal vel leh electricity inpekna a tibuai hle a, kum li/nga chhung vela thli a nat ber tum a ni hial ang,” tiin ANI a hrilh.
Weather department chuan khawthlang atanga thli thawin ruah leh thli na tak hi a ken luh niin a sawi.
Ramban-a Dharam Kund khuaah chuan in 40 chuang a chhia a, police-in mi 100 chuang an chhanchhuak.
Jammu-Srinagar National Highway dunga Nashri leh Banihal inkarah ruah sur nasa hian lei min leh lei tawlh hmun tam takah a siam a, hei hian lirthei kal a tibuai tih thuneituten an sawi.
Traffic department thupuangtu chuan Jammu-Srinagar National Highway-ah hian lei min, lei tawlh leh lung tla tam lutuk avangin lirthei a kal rih lo tih a sawi a. Khaw awm danin a zir hma leh kawng a tlang hma chu mite pawh zin rih lo turin an ti bawk.