Lei minin a chhilh mi 20 zawn hna thawk mek

China chhimthlang lam, Sichuan province-a lei min nasa taka avanga chin hriat lohva awm mi 30 chuang zawn hna thawh mek zel a ni.
Lei hi Jinping khua, Yibin-a Inrinni chawhma dar 11:50 (India-a zing dar 09:20) vela thleng niin state broadcaster CCTV chuan a puang a. Thuneitute chuan mi tam tak chin hriat lohvin an awm tih sawi a, an dinhmun a tha lovin an thih rinna a lian hle tih an sawi.
“In 10 a chhilh a, mi 30 chuang an bo va, mi 200 chuang thiar chhuaha hmun danga dah an ni,” tiin CCTV chuan a puang.
Lei hi a la che reng niin a hmuna awm chhanchhuah hna thawktute chuan an sawi niin an tar lang bawk a. Hmun danga dah chhuah rih mi chengte chu heng lai hmun la hnaih rih lo tura tih an ni.
President Xi Jinping chuan he thil thleng hi a ngaihven thu leh thuneitute chu chin hriat lohte zawng zung zung turin a ti a, a tlem thei ang ber thihna a thlen theih nana hma la turin a ti tih Xinhua news agency chuan a tar lang.
Ministry of Emergency Management chuan mi pahnih chhanchhuah an ni a, mi chuang hmun danga dah rih an ni a. Emergency response team-ten dam chhuak dang an awm em tih zawn hna an thawk mek tih a puang.
Premier Li Qiang chuan a bul hnaiah hetiang chhiatna dang thleng mai thei a awm em tih en fiaha chhui turin a hriattir ve nghal a. Mi cheng dangte pawh hetiang chhiatna thlen theihna hmuna an awm a nih chuan inthiar chhuak turin a ngen bawk.
Khuaa cheng pakhat chuan sorkar enkawl, Beijing News hnenah tun hnai khan tlang atangin lung a lum leh ringawt thin tih a sawi a, geologist-ten nikum khan enfiah tawh tih a sawi.
National Development & Reform Commission chuan rikrum atan leh thil chhiate tun dun a nih leh theih nan sorkar laipui atangin yan maktaduai 50 pek chhuah a ni tih Xinhua chuan a tar lang.