Service rivalry

Sawrkar hnathawk zingah service hrang hrang inkara inerna leh elrelna (Service rivalry) awm nasa lutuk chu tha a tih loh thu tunhnai khan chief minister Lalduhoma chuan a sawi a. Sawrkar hnathawk pawl thenkhat mahni pawl hamthatna tur dapa nasa taka sawrkar nawr ching an awm an remti lo a, dan a ni lo tih a sawi bawk.
He thu hi tun hnaia minister Lalrinpuii department chan, health & family werlfare leh social welfare & tribal affairs hnathawh an thlirhonaah chief minister hian a sawi a ni.
Sawrkar hnathawkte hian hlawh tha tak an neih bakah hamthatna eng eng emaw an nei bawk a. Heng hlawh tha tak leh hamthatna tha tak tak an neih chhan hi, mipui rawng tha taka an bawl a, ram leh hnam hmasawnna tura tha taka hna an thawh theih nan sawrkar (mipui) hian a duat hle a ni.
Hetia mipui sawrkarin duat taka sawrkar hnathawkte a enkawl laia, mipui rawngbawlna lama inelna thianghlim neih tak aruanga anmahni leh anmahni an lo iner a, inelrelna an lo nei thin leh, sawrkarin hamthatna a pek thin duhtawk lova thildanga hamthatna an la dap kual vak vak thin a nih chuan, an hnaah hian an lungawi lo tihna tluk te pawh a ni thei ang a.
Heng sawrkar hnathawk, lungawilohna lantir reng thin leh, hamthatna an dawn mek duhkhawp lova, dinhmun sang zawka awm inchuh reng thinte hian, kum tina a sang tel lehkhathiam thalai rual lo chhuak thin, hnathawh tur nei lote hi an hna thawh lai hi thawhtir an phal hauh si lo ang a, chuti chung chuan mipui hamthatna aiin anmahni hamthatna tur ringawt an buaipui thin a nih chuan, an inngaihtuah chian a tha khawp ang.
Mizoram mihring nuai 13 chuang tana annual budget-ah hian, heng sawrkar hnathawkte hlawh tur leh office enkawlna atan 70% vel a kal ral thin a, a bak 30% vel chauh chu mipui chan a ni. Hetah pawh hian sawrkar hnathawkte hi ‘mipui’ hamthatna ang zawng zawng (buhfai/tui/electric etc) dawngtu an la ni cheu bawk. Chutih laia an thawh chhan ber ram leh mipui hmasawnna thawk tam leh thawk chhuak tha nih inelna lam aia ‘service rivalry a nasa’ tia chief minister berin a sawichhuah tur khawpa thil a lo awm thin hi a vanduaithlak hle a. Sawrkar hnathawkte hian hna an thawh chhan mipuite hi an zah thiam a pawimawh hle a ni.