Leimin nghawng a na

Hunthar Veng huamchhung National Highway 54 chhaklama Vaivakawn ram inhmun rel leimin chuan nghawng a nei thui hle a, Aizawl tlak lam veng engemawzat bakah national highway kaltlanga state ei leh bar chawkluhna thlengin kalphung pangngai a tibuai mek.
Kumin June-a helai hmun lei min hi ruahsur laia chet belh zelin a chhak lam, Vaivakawn Zohnuaia Vanlalkunga in chu Ningani chawhma dar 10.45 vel khan a chim a, a in rel pum erawh a chim loa, Vaivakawn Changurkawn panna kawng pawh bal telin, lirthei kaltlang phal a nih loh hnu ah tlai lamah chuan mihring pawh kaltlang phal a ni lo.
Helai leimin avang hian chhungkaw 15 vel an intiarchhuak tawh a, an bungrua pawh an lo senghawi vek tawh. Vanlalkunga in bula a puzawnte in chu chim mai thei dinhmuna a din bakah hemi thlanga biak in sak lai chu a khi tan bawk a. Lei hi a la che reng nia sawi a ni.
Kumin June 16 khan Vaivakawn Zohnuai rama in rel lai chung chu a min a, a thlang Hunthar Veng huamchhung NH 54 a hnawhping a, a khat tawkin lei hi minin kawngpui pawh a hnawh zauh zauh a, tunah hian NH 54 kawng leh a chunglam Vaivakawn Chhangurkawn road hi khar ve ve a ni.
Kawng khar a nih avang hian Aizawl tlaklam venga lirthei tlan dan tihdanglam a nih bakah NH 54 kaltlanga Kawnpui lam panna kawnga lirthei tlan dan thlengin a nghawng a, traffic lam thuneituten lirthei tlan tur an ruahman thar a ni.
Ningani vek khan Bawngkawnah pawh leimin vangin Assam type in pakhat chu chim mai thei dinhmuna a din avangin khawtlangin an thiat. Thudawn danin he in neitu hi F Vanlalmana a ni a, an in thlang lam hi tunhnai ruahsurah minin, in hi chimpui mai thei a ni tawh avangin thiah khalh a ni.