Leimin vanga in chimah nupa leh an fa pakhat thi

July 2 zing khan ruahsur nasa vanga leiminin Zemabawkah Assam type in pakhat a hnawl tel a, he ina cheng nupa bakah an fanu an thi.
Thawhtanni nileng leh zan lam bakah Thawhlehni zing thlenga ruahsur vangin, Thawhlehni zing dar 5.30 vel khan Zemabawk High School Vengah Assam type in, F Lalrokima te chhungkaw chenna chu a hnawl a, chhungkaw pa ber leh a nupui bakah he ina cheng midang pathum chu an insaseng hman a, in neitu fate nupa – Isak Chhangte (32) leh Lalrinchhani (25) leh an fanu Abigail Lalchhanhimi (4) chu a hnawl tel a ni.
District Disaster Management Authority Aizawl hnuaia Quick Response Team leh khawtlangin anmahni zawn hna hi thawk nghalin, ruahsur leh lei tawlh reng vangin chet a harsa a, chawhma dar 10.30 velah an ruang hi an lachhuak kim a ni. Nizan khan lumen an ni a, vawiin – July 3 hian vui an ni ang.
Thawhlehni zing dar 6.00 vel khan Zuangtuiah leiminin chenna in pathum, chhungkaw li luah lai chu leiminin a hnawl bawk a, lei hi a hmaa a lo chet tawh avangin in luahtute hi an insaseng hman vek a ni.
Zuagtui lei tlahniam venga Varthanzaua in, semi-RCC, Zopa chhiara chhawng thum chu leimin vangin a chim a, a thlanga Sangchhuana te chhungkaw chenna, Assam type in leh mahnia khawsa, Kaia chenna Assam type chu a hnawl a ni. Lei hi a lo chet tawh avangin a hnawl hmasak berte hi Thawhlehni zan khan an riakchhuak a, a thlanga in pahnih pawh hi an riakchhuak sa a ni.
Varthanzama te in sir lehlam lehlama in pathum pawh a thlang lam a min avangin Thawhlehni zing khan an inthiar chhuak a ni.
Ruahsur nasa avang hian Thawhtanni zan leh Thawhlehni zingah Aizawl khawpui kawngpui thenkhat leh veng inkalpawhna ping a awm nual a. A tam zawk hi chu thenfai lehnghal. Zuangtuiah chhungkaw 16, Sihphirah chhungkaw 1 leh Falkland Vengah chhungkaw 15 chu leimin leh khi avangin an inthiarchhuak a ni.