Leithaa bawlhhlawh siam dan zir

District Education Office Champhai chuan Mizoram Polution Control Board bultumin Champhai town chhunga thlan bik eco-club dinna school 10 atanga zirlai thlanchhuah 50 tan Mission LiFE programme hnuaia bawlhhlawh tawih thei atanga leitha siam (waste composting workshop) a buatsaih.
Champhai DEO C Lalbiakzauva chuan environment chhe mek venghim turin mitinin kan khawsak phung tha lo kan thlak a ngai a, environment tichhe thei hmanrua kan bansan a ngai, tiin, Pathianin min pek leilung malsawmna zar kan zo chu a venghimtu leh siamthatu nih ve thung a ngai tawh tih a sawi a ni.
Zirlaite hi bawlhhlawh tawihral thei leithaa chantir dan zirtir an ni a, chhungtinin kan tih theih hmun zimtea bawlhhlawh sawngbawlna kalpui dan a taka entir an ni bawk.
Zirtawpni vek khan Bethel High School Eco Club chuan District Education Office Champhai kaihhruaiin Keilungliah Tuikhuah kam vela bawlhhlawh chharin an tifai a. Office staff leh zirtirtuten zirlaite hi an ho a ni.