Leiverh chim hai turin rat miner ko lut

Leiverh chim hai turin rat miner ko lut
Nagarkurnool district, Telangana-a Srisailam Left Bank Canal (SLBC) leiverh chima tang thawktu pariatte chu chhanchhuah tuma beih mek zel niin an dam chhuah theihna a tlem hle nia sawi a ni.
Inrinni tuka chhiatna thlenna hmunah hian Telangana sorkar chuan sazu kua hreuh anga hreuh thiam, rat miner an tihte a ko lut a, heng mite hi Silkyara Bend-Barkot leiverh chima tangte lo la chhuak tawhtute an ni.
Indian Army, Navy, NDRF leh agency dangten bei mek mah se lei leh lung bakah thir leh cement tlang lian tak takin a hnawh nasat avangin sut pawp theih mai a ni lo va. A tlawhtu an state minister chuan hima lak chhuah theih chu thil khirh tak a ni dawn tih a sawi.
“An dam chhuah theihna hi a tlem tak zet a. Kei pawh a luh theihna tawp thleng ka kal a, metre 50 chauh a ni a. A thla kan lak pawhin a tawp kan hmu thei lo va, feet 30 bial leiverh a ni a, feet 25 vel thleng chu a inhnawh vek a ni,” tiin Jupally Krishna Rao chuan PTI a hrilh.
“Kan koh pawhin min chhangtu an awm thei lo va, dama lak chhuah an ni lo vang tih a hlauhawm hle,” a ti.
Oxygen luhna tur pawh a awm lo thei tih sawiin an theih ang angin oxygen an pe lut a, tui tling pawh an paih reng tho tih a sawi.
Rao-a hian kum 2023-a Uttarakhand-a Silkyara Bend-Barkot leiverh chima tangte lak chhuahnaa tel rat miner team chah thlengin hna an thawk tan tih a sawi bawk.
Army, Navy, Singareni Collieries leh agency dang bakah central leh state disaster response team-a member 584 chuan leiverh hi vawi sarih an endik tawh a, gas cutter hmangin thir awmte an tan reng bawk.
Ui fing pawh lak an ni a; mahse, tui a la tlin tam em avangin hma an sawn thei chuang lo.
Telangana Chief Minister Revanth Reddy chuan mi tangte chhanchhuah tuma beihna kawngah a tih theih apiang ti turin thuneitute a hrilh.
SLBC leiverh chim atangin darkar 48 chuang a liam tawh a. A tangte hi Uttar Pradesh atangin Manoj Kumar leh Sri Niwas, Jammu & Kashmir atangin Sunny Singh, Punjab atangin Gurpreet Singh leh Jharkhand atangin Sandeep Sahu, Jegta Xess, Santosh Sahu leh Anuj Sahu te an ni tih hriat tawh an ni.
An zinga pahnih hi engineer an ni a, pahnih hi operator niin pali chu kut hnathawk an ni.
Telangana Roads & Buildings Minister Komatireeddy Venkat Reddy chuan hima an lak theih ngei a beisei tih a sawi a. An thawhpui, hima tlan chhuakte pawhin an thiante hi dama hmuh leh ngei an beisei.
An zinga mi, Nirmal Sahu chuan leiverh chhungah hian February 22 tukah an lut a, tui a lut nasa a, lei pawh nemin a tla tan niin a sawi a. Hlauhawm a hnai tih hriain an tlan chhuak a, an zinga pariat chu an tlan chhe ve hman ta lo niin PTI a hrilh a. Amah hi Jharkhand mi a ni.
Tlanchhuak thenkhatte pawh hian hliam tenau an tuar nghe nghe.