Leiverh chima tangte dap turin ruang zawng thiam ui ko lut

Leiverh chima tangte dap turin ruang zawng thiam ui ko lut
Telengana-a Srisailam Left Bank Canal (SLBC) leiverh chima a chim hnan mi pariatte zawn hna kal zelah Kerala Police atangin ruang zawng thiam ui pahnih leh a enkawltute chah luh an ni.
Kerala Chief Minister’s Office (CMO) chuan National Disaster Management Authority (NDMA) atanga an State Disaster Management Authority hnena ngenna an dawn angin ui fing hi tirh an ni tih an sawi a, khawi laiah nge tangte an awm tih an daptir dawn a ni.
Hetih lai hian NDRF Commandant VVN Prasanna Kumar chuan Thawhtanni khan SLBC leiverh chima tang mi pariatte chhanchhuah tuma hna thawh chu theihtawpa beih zel a nih thu a sawi.
“Beihpui hi a zawng zawnga thlak a ni a, agency 12 velin chhunzan zawmin an thawk a. Vanduaithlak takin tun thlengin a chim hnante hi la hmuh an ni lo thung a ni,” a ti.
Kumar chuan Telangana leh sorkar laipui chuan ram chhung hmun hrang hrang atangin leiverha chhiatna thlenga hna thawh mek pui turin mi thiam an chah khawm niin a sawi bawk.
“Leiverh awm dan hi a buaithlak deuh hlek avangin tun thlengin hlawhtlinna hmel kan la hmu lo va. Hetih lai hian mihring tam tawkin ruahmanna mumal tak hnuaiah kan bei a, hun rei lo teah kan hlawhtlin ngei kan beisei a ni,” a ti.
NDRF commandant chuan NDRF member 100 telin SDRF, Indian Army leh Singareni team nen mi 300 rual velin chhanchhuah hna hi an thawk reng a ni tih a sawi.
“Kan tana buaithlak ber chu TBM (Tunnel Boring Machine) a ni a, tonne 1,500-a rit khawl hi a chhungah hian a chhe tlat a, hei hi a buaithlak ber chu a ni,” a ti.
Telangana Chief Minister Revanth Reddy chuan Pathianni khan leiverh hi tlawhin chhanchhuah hna thawh dan hi a en.
SLBC veiverh, Nagarkurnool hi a chim atanga ni 13 a liam tawh a, February 22-a a chim hnuah khan a chhunga tang mi pariatte chhan chhuah tum hian team hrang hrangin an la bei reng a ni.