Israel-in a dan hnuah Gaza-ah ei tur a zo tep

Israel-in a dan hnuah Gaza-ah ei tur a zo tep
Israel-in puihna thil lak luhna a danchah hnuah Gaza-ah chuan ei leh in man a sang tawh hle a, a awm chhun pawh rei lo teah a zo dawn niin UN-a humanitarian agency chuan a sawi.
OCHA-in a thawhpuite chuan hmun thenkhatah chuan chhangphut leh thlaite chu a let aia tamin a to tawh hlawm niin Gazan-ten an sawi tih BBC an hrilh.
Lak luh hi dan zel a nih chuan ‘vantlang choka 80 vela ei tur chu a zo dawn’ a, ‘mi 5,00,000 ei tur chaw dah thatte pawh a zodawn’ niin OCHA chuan a sawi.
Prime Minister Benjamin Netanyahu-a chuan kar tawpah khan puihna lakluhna hi a dang a, Hamas-ten thil lutte an ru nia puhin US-in Gaza-a inkahhai pawh sei a rawtna a duh lo bawk niin a sawi a. Hamas thupuangtu erawh chuan ‘inbumna mawl tak’ niin a sawi ve thung.
France, Germany leh UK foreign minister-te chuan Nilaini khan thuchhuah intawm siamin Gaza-a chengte dinhmun chu a rapthlak tak zet tih sawiin Israel thil tih dan chu tha an tih loh thu an sawi.
“Israel sorkarin Gaza-a lut tur bungrua leh puihna thil dan hi khawvel huap mihring dan palzutna a nih a hlauhawm,” an ti a. “Mihring puihna thil hi inkahhai leh politics khelh nana hman tel tur a ni lo,” an ti bawk.
Minister pathum hian inkahhai, Hamas-in an mi hren an chhuah leh puihna luhtir chu a pawimawh tak zet tih an sawi.
January 19 atanga inkahhai puan a nih atang khan Gaza-ah hian kar tin puihna thil phur truck sang tel a lut hman.
Inrinni zana inkahhai thawh khatna a zawh rual khan Netanyahu-a pisa chuan Hamas-in puihna thilte chu ruin ‘an firfiakna thil atan’ an hmang niin a sawi.
Hamas chuan a hma atang tawhin Gaza-a puihna thil rua puhna hi an lo pha tawh thin.
Netanyahu-a hian Hamas-ho hian chawlhkar ruk chhung inkahhai pawh sei an pawm lo niin a sawi a, hei hi US President Trump-a palai, Steve Witkoff-a rawt a ni.
Puihna an dawn a tawp hnuah OCHA chuan Thawhlehni atang khan vantlang chokaah chuan ei leh in an sem chu a bi an tukin an ren tan tih an sawi.
An thawhpui dangte pawhin an chaw sem chu an ren hle tawh tih an sawi bawk a. An sem thin dan pangngai anga an tih zel chuan an chatlak thuai dawn tih an sawi.
Thil man pawh Pathianni zan vel atang khan a to nghal vek a. A let te, a let thum dawna tote pawh a awm niin mi chengte chuan an sawi.
Mi thenkhat chuan thil man to hi sumdawngte vang niin an sawi bawk.
US nena Israel leh Hamas inkara palai hna thawktu, Qatar leh Egypt chuan Israel chet dan chu an dem thu an sawi ve ve tawh.
Qatar foreign ministry chuan ‘inkahhai inremna bawhchhiatna’ tia a sawi bakah ‘khawvel huap mihring dan bawhchhiatna’ a ti bawk.
Egypt foreign ministry pawhin Israel hian tam chu ‘Palestinian mipui laka ralthuamah a hmang’ niin a sawi bawk.
Thla khat liam taah khan OCHA chuan mi maktaduai khat chuang, Gaza-a cheng zahve vel chuan inkahhai kalpui a nih atangin puihna ei tur an dawng tih a lo sawi tawh.
Tunah erawh chuan ei tur chauh ni lo, thil danga puihna zawng zawng pawh dan hian a nghawng vek.
Medical Aid for Palestinians (MAP) chuan Gaza-ah hian damdawi inahte damdawi a tlem tawh a, rualbanlote hmanrua pawh a awm lo niin an sawi.
Inkahhai puan kha thla 15 chhung indona, Hamas-in October 7, 2023-a Israel rûna mi 1,200 chuang an thah leh hren tura mi 251 an lak avanga Israel-in a beih zuina tihtawp lailawkna a ni.
Israel-in Gaza-a Hamas a beih letnaah hian mi 48,405 an thi tawh niin Hamas enkawl health ministry chuan a sawi.