Len rei a zahthlak loh!

Nupui pasal nei har deuh te hi ‘senior’ tiin ‘nei ve tawh rawh’ te hi kan inti leh ngawt thin a, thenkhat lahin fiamthu thawh nan tak an lo hmang ve chhen bawk a. Mahse, kawppui i neih loha, miten ‘senior’ an tih che pawhin pawi ti lem suh. Mr Wrong nena inkawp ai chuan i tana khuanu ruat kha lo nghak char char mai rawh. Chutih chhung chuan i ‘single’ nun kha hlim takin lo chen rawh le.
I kawppui neih loh kha hrehawm tiin lungngai suh, hei le, i ‘single’ chung pawha hlim taka i awm theihna chhan tur a awm e:
1. I duh duh danin i awm thei. Kawppui i neih loh chuan i duh angin i awm thei. I duh duhnaah i kal thei a, i kawppuiin a duh ve leh duh ve loh i ngaihtuah buai a ngai ve lo. I nuam tih zawng ti la, midang venthawn ngai hauh lovin nun zalen i hmang thei e.
2. Tute nupa emaw hlim hmel taka inkai ral rala khawlai leng i hmuh khan i lo awt ru viau pawh a ni thei a, chutianga han tihpui tur chu i duh viau pawh a ni thei. Mahse, nupa zawng zawng hi an hlim vek kher lo tih hre phawt teh. Nupa nunah hian hlim lai a awm ngei a, chumi letling chiah pawh chu a awm ve tho. Thawnthu leh film vela i hmuh ang ringawt kha nupa nun a ni hauh lo. A chang chuan an kawppui te chu then zawk mai tur em ni ang? tih te pawh an ngaihtuah ve fo tho a nia.
3. I awmdanah kha lawm rawh. Mihring te hian kan neih loh kan awt a, kan neih sa kan ning leh thin. Kawppui nei lo ten kawppui tur an duh a, kawppui nei tawh ten zalenna an duh ve leh thung thin. Chu chu min ti hlim lotu chu a ni mai. In-date, flirt, mi thar tawn, i duh zawng thlan, chung zawng zawng chu kawppui i neih loh chuan i ti thei vek.
4. I kawppui neih loh khahmang tangkai thiam rawh. Miin kawppui a neih tawh chuan chu nun atan chuan a hun tam zawk a sen a ngai tawh. Mahse, ‘single’ tan chuan i duh duh i la ti thei. I career atan a ni emaw, i zirna atan emaw, i hobby emaw, i nih duh ang ni thei turin hma i la la thei. Chu remchanna chu kawppui neih tawh chuan a bo then tlat tawh a nia.