Lengpui Airport: A sawi hun lai …

Lengpui Airport Forum chuan Lengpui Airport chungchangah political level-a India sorkar dawr tul an tih thu an auchhuahpui leh a, nimin khan booklet “Indian Air Force (IAF) hnena Lengpui Airport hlan hi a him lo” tih an tlangzarh a.
Booklet tlangzarhtu PC Lawmkunga IAS(Rtd) chuan, Mizoram sorkarin Airports Authority of India (AAI) a dawr dan chu a la nep deuh a, an la dai thuk lo a, thuneitute a la pawh pha lo nia a ngaih thu a sawi a. IAF kuta hlan tum hi a dikna chin pawh a awm mai thei, mahse, pawisa neih dan kawng an dap em tih chu zawhna awm thei a ni, a ti bawk.
A sawi hun lai a ni a, kan sawi luai luai lo thei lo. Social media lamah pawh interview hrang hrang, ngaihdan hrang hrang a leng nuk nuk a, session-ah pawh Lengpui Airport chungchanga private member resolution sawiho a nih dan leh duhthlan tur pathum chhawpchhuah a nih tawh dan te pawh kan hre vek tawh a. Tunah hian 16th Finance Commission member-ten min chamchilh mek a, an lakah beisei sang tak kan nei mek a, rei a rial lo turah ngai ila.
Kan mithiamten an sawi ang hian, sawrkarin AAI hotute an dawr dan hi a lo la pawnlang viau em ni ang tih hi mipuite zawhna chu a nih a rinawm a. AAI lam duh dan kan hriat bel viau laiin, Mizoram sawrkarin a lo ‘react’ dan hi hriat tur a tam lo hle chu niin a lang. “Anni lamin chutiang chuan an ti a, keini lamin chuti zawk chu ni se tiin kan nawr let a…” tia chipchiar deuh zawka keini lam side duh dan sawirikna hi mipui lam hian kan la hre tam lo a ni maithei. Tin, AAI dawr chungchanga thuneitu sang zawkte nena indawr dan te pawh chu kan mithiam ten an sawi ang hian a la lau deuh em ni ang tih te chu mipui rilruah a riak mek niin a lang.
Eng pawh ni se, a sawi hun lai a ni a, sawrkar demna lam rawngkai ngawr ngawr ni lovin, kan vaia that tlanna tur duhna rilru dik pu chung leh thahnemngaihna dik nei chunga sawrkar hmalakna turah tangkai taka kan tawiawm a, kan finchhuah hi a pawimawh takzet a. Hetianga ram hnuk khawih thil zalen taka sawiho theihna hi a ‘democracy’ lai chu a ni. A sawi hun lai a ni a, party hamthatna atana sengluh tumna rilru paihin, ram leh hnam hamthatna tur lamah rilru sawr bing theuh i tum ang u khai.