Rev. Dr. Zaichhâwna Hlâwndo
-- Advertisement --
2 Chronicles 7: 14 ah “Ka hming pu ka mite chuan inngaitlâwma an tawngtaia, mi zawna, an awm dân sualte an hawisan chuan, vân atangin ka lo ngaithla ang a, an sualte ka ngaidam ang a, an ram chu ka tidam leh ang.” tih kan hmu. He thu hi Solomona hnena Lalpa thu lo thleng a ni. Jerusalem Temple tawngtaina a an hman dan tur a hriattirna a ni. Lalpa Pathianin he an tawngtaina chhan tur leh tawngtai hun tur chu chiang takin hetiang hian a hrilh “ Vân te ka khara, ruah te a sûr loh emaw, khaukhuapte ka tirha, ram te a tihchhiat emaw, ka mite zînga hri ka lêntîr emaw pawhin” (2Cronicles 7:13) tiin.
Tun hi tawngtai hun chu a ni em ? Aw ni teh reng mai. Kan ram leh hnam a dam lova, kan khawtlâng leh chhungkua kan dam lo. Hripui Covid 19 an tih mai hrilengin kum 2 chuang inkhawm ngamlo leh Biak Ina tawngtai pawh ngam lo khawpin min awp bet. Cancer natna tihbaiawm tak chuan khaw tin leh veng tin mai hi min luhchilh a ni ber mai. AIDS natna vei ngei finfiah pawh sing hnih chuang kan awm mêk. Tualthahna râpthlak tak tak thawm a reh hlei thei lo. Thih thut thut hri a leng nasa. Ruihtheih ngawlvei buaipui sen loh khawpa tam hi veng tin leh khaw tinah kan awm emaw tih tur a ni. Kan ran vulh nasa takin an pul a, kan thlai chinte pawh nasa takin a täm. Pathian tihdamna kan mamawhna hi van tawng rak thleng tur chu a ni chiang mai..
A nih leh eng tin nge kan tawngtai dawn? Mizoram Kristian-te aia tawngtai tam hi khawvêlah an awm bik lovang tih khawpin kan tawngtai nasa. Kohhran pawl tin deuhthaw hian tawngtai Inkhawm kan nei a, chhung inkhawm tawngtai ni tina nei pawh kan thahnem. Fianrial tawngtai pawh kan uar hle. Political party thleng hian chhung inkhawm neiin kan tawngtai thin. Amaherawhchu Mizoram hian sual kan hawisan em ti ila “HAWISAN LO” tih chu chhanna awlai tak a ni. Kan ramah hri hlauhawm tak takte an bo em? tih chhanna chu “BO LO” kian chu sawi loh a pung tual tual a ni ber mai. Kan ram hi a dam em? tiin in zawt ila “ DAM LO” kan ti deuh vek ang.
Chuvang chuan kan tawngtai dan hi kan ngaihtuah chian a ngai. Lalpan tawngtai dan tur a sawi pathum (1) Inngaitlawma tawngtai (2) Pathian zawn leh (3) Awm dan sualte hawisan hi tih hmasak a ngai. Vawi engzat pawh tawngtai ila, Lalpan tawngtai dan tura min hrilh anga kan tawngtai hma loh chuan VAN A|ANGIN a lo ngaithla dawn lo. Kan sual a ngaidam dawn lo, kan ram a ti dam dawn lo. Chuvangin kan ram leh hnam, khawtlang leh chhung tinte kan damna turin Pathian thinlung thleng pha turin amah kan Lalpa Pathianin thil pathum min phut hmanga tawngtai a ngai.
Nikumah Lammualah leh hmun hrang hrangah pawh State Day pualin kan tawngtai tawh. Kumin pawh kan tawngtai leh. Mahse kan tawngtaina kha van atangin a lo ngaithla ang em tih ngauhtuah a ngai? Inngaitlawmin, amah Pathian chen tlak lohna keimahni ah a awm leh awm loh indap hmasain, chung a duh loh zawng zawng chapona te chu kalsan/bansanin kan tawngtai em? Amah Pathian chenna daltu kan nunah a awmte kan inbih chiang em? Pathian duh loh zawng sual kan tihte chu kan kalsan em? Chutiang ni lova kal khawma ring deuh deuha aurual kan nih chuan van khawpui nghawr nghingin Pathin beng a thleng pha dawn lo.
Mosia tawngtaina te kha a va ropui em! A mite sualnaah mawh a phur ngam a nih kha. Jona pawh khan ama sualna avanga lawng chu pil mai tur a ni tih a hria. Mipuite himna turin tuiah min paih rawh u a ti ngam. Joba chuan “chuvâng tak chuan ka inten a, vut leh vaivuta thuin ka sim ta e,” tiin a tawngtai a nih kha. Mipuite damna turin ram hruaitu, kohhran hruaitute mawhphurhna hi a sang tih kan hriat a hun tak zet a ni. “Dik taka lalin ro a rêl chuan ram a ding chhuak a, Thamna ngawt a ngaihtuah chuan ram chu a tluchhe thîn (Thufingte 29:4). Hawh u Lalpa ngaihthlak leh chhan tlak tur leh kan RAM damna turin ZOFATE hi i tawngtai tawh ang u.