LENGPUI AIRPORT TOBUL

Prof. JV Hluna
P.C. Ministry 1978-a a rawn din tan lai kha chuan Mizoram atanga thlawhna tumhmun hnai ber chu Silchar – Kumbigram a ni a. Aizawl atanga 200km chuanga hla a ni. Hetih lai hian India hmarchhak State dangte chuan thlawhna lian chi Boeing 737 khualzin phur chite leh bungraw phurh theihna thlawhtheihna lian tum theihna airfield an nei vek tawh a. Mizoramin kan la neih ve si loh avangin a rualawhthlak hle a ni. Tichuan October 1981 kumah Pi Indira Gandhi, Prime Minister hnenah kan Chief Minister Brig. T. Sailo chuan ziakin High Power Survey and Investigation Team rawn tir turin ngenna a thehlut a. Prime Minister chuan Central Cabinet Minister for Civil Aviation, Pu Kurshid Alam Khan hnenah a lo bawhzui turin a thawn nghal a. Tichuan, Chief Minister leh Pu Lalhmingthanga, Finance Minister nen chuan an bawhzui ta nghal a.
Central Sorkar chuan expert team-te chu 1982 May-ah a rawn tir ta a. Hemi tum hian Pu Lalhmingthanga’n Chief Minister tirh angin expert team chu Helicopter-a hruaiin hmun hrang hrang Lengpui khaw bul ram te, Sesawng khaw bul Mualmam ram te, Paikhai Bangla bul ram te, Lungleng khaw bul ram te leh Pukpui khaw bul ramte kawhhmuhin a fanpui a. Annin heng hmun hrang hrang hi uluk taka thlirin an zir chiang nghal zel a. A tukah Chief Minister residence office-ah Chief Minister Chairman-na hnuaiah meeting an nei zui nghal a, hetiang hian thutlukna siam a ni :
(i) Expert team-te chuan Lengpui khawthlang lam West Phaileng – Tuipuibari kawng atanga Hmunpui khaw panna kawng atanga hmar lam ram chu an ram en zingah a tha bera an hriat avangin thlawhna tumhmun siamna atan chuan an thlang ta a.
Chumi hmun chu thlawhna lian Boeing 737 te pawh tum theihna tura thlawhna tumhmun atan siam turin an team chuan Central Sorkarah recommendation an thehlut ang.
(ii) Chumi rual chuan he lai hmun leh a chheh vel ram hi detail project report siam theihna turin Mizoram Sorkarin Survey of India hnenah a map a lo siam tir ang.
(iii) Airport siam hunah ram compensation pek ngai a awm loh nan Mizoram sorkarin he lai area leh a chheh velah hian ram pass chi hrang hrang pek chhuah a titawp vek ang a, Lengpui Village Council pawhin ram a pe chhuak tur a ni lo ang.
(iv) Survey of India-in a map a siam peiha Mizoram sorkar hnena a hlan veleh Mizoram sorkarin Ministry of Civil Aviation-ah a copy pe-in detailed project report siam vek turin a hrilh ang.
Expert team-te chuan an report chipchiar leh recommendation chu Ministry of Civil Aviation-ah thla thum hnu velah chuan an thehlut ta a. Cabinet Minister for Civil Aviation Pu Kurshid Alam Khan ngei chuan approval (remtihna) a pe ta a ni. Hemi hnu lawk hian Pu Kurshid Alam Khan chu Tamil Nadu State Governor tura lak chhuah a ni ta a. Lak chhuah a nih hmaa hetianga approval a lo pe hman hi a lawmawm lehzual a ni.
10th Finance Commission Chairman Pu K.C. Pant-a leh Member dangten 1993 a Aizawl an tlawh lai khan Chief Minister Pu Hawla Sorkar a Finance Minister chu Pu Lalhmingthanga kha a ni a. (Congress leh PC (MJD) Sorkar intawm a ni). Chief Minister-in an hnena a sawi duh a sawi zawh hnu-ah midang tan hun a pe a. Pu Hminga chuan ‘Mizoram atanga Airport hnai ber chu Silchar – Kumbigram a ni a, chu chu Aizawl atanga 200 km chuanga hla a ni. Airport puitling neih hi kan mamawh ngawih ngawih a ni’, a ti a. Pu K.C. Pant-a chuan “Chung chu FC perview a ni lo, Planning Commission-ah sawi rawh u,” a ti a. Pu Hminga chuan “India hmar chhak State dangte chuan thlawhna lian chi Boeing 737 khualzin phur chi leh bungraw phurh theihna thlawhna lian tum theihna Airport puitling nei lo kan ni a, Special Provision-in Finance Commission hian Airport siamna tur Fund min pe ngei turin ka ngen che a ni,” a ti tlat mai a.
Pu Hawla, CM hova an meeting zawhah Civil Hospital tlangah a hruai a, Durbin-in Lengpui thlawhna tum hmun siamna atana Expert team te recommend dan leh Civil Aviation Minister, Pu Kurshid Alam Khana’n a lo approved tawh te chu a enpui a, a hrilhfiah bawk a. Pu K.C. Pant-a pawhin “Young & Competent Finance Minister Lalhmingthanga kha ka hnial hneh lo a, Lengpui Airport siam bul tan na Crore 45 ka dah ta a ni” tiin FC Chairman a nih loh hnu a Delhi-a an ina Pu |hena nen chhun chaw kan eia kan titihonaah a sawi chhuak a ni. NEC-in Crore 10 dang chu an pe ve leh nghal a ni awm e.
Kan tangka neih chhuna Airport kan siam ngei theih nan Pu |hena Ministry lai a an lo thlan fel area chhunga ram neitu hrang hrang Aizawl pa hlir te chu tlawmngaia an ram Compensation awm lova pe turin Minister ten an inah len chilhin an ngen a. Minister pawh an insem darh a, “Tlawmngaia Zoram tana ram an pek theih chuan an kut lo thlak tawhna Sangha dil a ni emaw, huan thlai leh teak leh thing an lo phun man chu ngun taka chhutin Sorkarin a man an pe vek ang.” tiin thiam takin an dil a. Kha laia ram tana mahni huan enkawl lai neitute khan an “donate” ta vek a ni. An va fakawm em! Tunlai kawng leh hmun hma Sorkarin ram hmasawn nana an mamawh hian Sorkar lam leh a ram neitu apiangte hian i entawn ve ang u.
A ram lak fel a nih a hnathawktu tur thlan zawh anih khan bul tan nan hnatlangpui koh a ni ta a. Aizawl atanga Sorkar Officer Motor kawl zawng zawng Hnatlangpui a kal vek tur tih Order avangin motor leh mihring tam tak an Lengpuiah hnatlangin an kal a, ruahman lawk angin Chakma Minister (Nirupam Chakma) in a chek hmasa ber a nih kha. Lengpui Airport tihpuitlin nana Pu Hawla hna thawh zui zel a ropuiin a fakawm ngawt mai.
Tuirial Airfield chungchang hi hun dangah kan la sawi leh dawn nia.