Liam Payne sana bo an chhui

Liam Payne sana bo an chhui
One Direction star Liam Payne thihnaah Argentinian thuneitute chuan Payne-a sana, Rolex, pound 30,000 (Rs 32,47,000 vel) man bo an la chhui ta zel a, he thihnaah hian Payne hi ama tawka chesual a nih loh ring pawl te pawh an awm ta.
Payne hi October ni 16 khan Argentina khawpui Buenos Aires a a thlenna hotel chhawng thumna bathlar atanga tlain a hliam tuar loin a thi a, a ruang an endiknaah a thisenah ruihhlo chi hrang hrang an hmu bawk.
Payne a thihna an chhuinaah thuneitu ten a thih hma lawka CCTV footage-ah sana hi a bun tih an hrechhuak a, mahse, a ruangah hian sana a bun ta tlat lo mai a, hei hian ngaihven a hlawh ta a, Payne sana hi thuneitu ten hmuhchhuah tumin an zawng zui ta a ni.
Police ten he thihnaa Payne hnenah ruihhlo petu ni a puh hotela hnathawk mi pahnih leh an thian pakhat te chu an in an dap sak tawh a, mahse, sana hi hmuh tur a awm lo. Payne thih hma lawka a hmeichhe awmpui pahnih te pawh an endik hnuah sana hi an la hmu ta chuang lo a ni. Heng hmeichhe pahnih te hi Payne thihnaa rinhlelh (suspect) ni lovin, thuhretu (witness) anga ngaih an ni thung.
La Nacion-in a tarlan danin thuneitute chuan Liam Payne thlenna hotel suite hi a tum hnih nan an dap nawn leh dawn a ni.