Lil Uzi Vert ‘Pink Tape’ a No.1

Lil Uzi Vert ‘Pink Tape’ a No.1
Lil Uzi Vert album thar ‘Pink Tape’ chu Billboard 200 (albums) chart No.1-aha debut a, he chart-a No.1 kai thei album pathum a neihna a ni ta a, kumina he chart-a rap album No.1 kai thei hmasa ber a ni bawk. ‘Pink Tape’ hmaa he chart-a rap album No.1 kai hnuhnung ber chu Metro Boomin album ‘Heroes & Villians’ niin, December 2022 khan a No.1 a, kar 29 hnuah he chart-ah hian rap album a No.1 leh ta chauh a, 1993 hnuah he chart No.1 a rap album a âwl rei ber tum a la ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Lil Uzi Vert ‘Pink Tape’ hi kar khat chhunga 1,67,000 hralhin chart No.1-ah a debut a, chung zinga 1,54,000 chu streaming atanga album hralhna tlukpui (on-demand official stream maktaduai 210.39) niin, album tak tak hralhna chu 11,000 a ni a, album-a hla mal hralhna atangin 2,000 a tling thei bawk.
Uzi hian a album hmasa Eternal Atake chu 2020 khan No.1 kaipuiin, Luv Is Rage 2 chu 2017-ah a No.1 pui tawh bawk a, a album dang, Future nena an thawh dunna Pluto x Baby Pluto chu 2020 khan No.2 a kai tawh bawk.
Morgan Wallen album ‘One Thing at a Time’ chu 1,10,000 hralh lehin kar 15 a No.1 hnuah No.2-ah a tawlh tawh ta a, ‘One Thing at a Time’ hi 2011-12-a Adele album kar 24 No.1 thei ’21’ hnua he chart-a No.1 ni rei thei ber a la ni. One Thing at a Time hi chart-ah kar 18 lang tawhin, he kar 18 chhung hian kar tin 1,00,000 an hralh tling ziah a, US-a album kartin 1,00,000 hralh tlin rei theih ber album a la ni.
Peso Pluma ‘Genesis’ chu 68,000 hralh lehin No.3 a la ni a, chart No.1 hlui Taylor Swift ‘Midnights’ chu 54,000 hralh lehin No.4 a la ni a, chart No.1 hlui bawk Morgan Wallen ‘Dangerous: The Double Album’ chu 48,000 hralh lehin No.7 atangin No.5 a kai thar leh a, chart No.1 hlui tho SZA ‘SOS’ chu 44,000 hralh lehin No.8 atangin No.6 a kai thar leh a, Gunna ‘A Gift & a Curse’ chu 44,000 tling lo deuh hralh lehin No.5 atangin No.7-ah a tawlh ve thung.
Taylor Swift album dang, chart No.1 te pawh lo ni tawh ‘Lover’ chu 43,000 hralh lehin No.9 atangin No.8 a kai thar a, Aespa album thar ‘MY WORLD’ chu 40,000 hralhin No.9-ah a debut a, he Korean group hian he chart top 10-a lang thei album pahnih an nei ve ta a ni.
Top 10 khartu chu rapper Rylo Rodriguez niin, a album thar ‘Been One’ chu 35,000 hralhin No.10-ah a debut a, he chart-a a album lang thei pahnihna niin, top 10-a a lan vawi khatna a ni.