Lily Veng Cultural & Drama Club-in Silver Jubilee lawm
Lily Veng Cultural & Drama Club (LCDC) chuan Inrinni khan an din champha vawi 25-na, Silver Jubilee an lawm a. Bialti MLA, minister Vanlalhlana’n a hmanpui.
Mizo nun zemawi leh culture humhalhtu club tha tak a ding chu chhuanawm a tih thu Vanlalhlana hian sawiin, kan culture chu kan nunhlui pholanna chauh a ni loa, hun lokal zel tur duangtu pawh a ni tih a sawi.
Mizoram sawrkarin ‘Bana Kaih’ policy a kalpui mekah thalai, mahni kutkea din tumte tan ruahmanna hrang hrang a awm tih sawiin, “Cheng nuai 50 thleng sumpai tanpuina pek theih a awm a. Loan anga kalin sawrkar chu guarantor-ah a tang dawn. Sumpai harsatna avangin Year of Consolidation kan puang a, sawrkar kum kal mekah chuan pilot project angin kan kalpui rih phawt dawn a ni,” a ti.
Minister chuan Lily Veng Cultural & Drama Club member-te chu thangtharten Mizo culture an hriat theihna atan hma la zel tura chahin, Ministry of Culture-a Scheme of Financial Assistance for Promotion of Art & Culture hnuaia Cultural Function Production Grant hmangin fund haichhuah theih a beisei tih a sawi a. Theihtawpa hma lakpui zel a tum tih a sawi a ni.
Kum 2003-a Mizoram Drama Organisation (MIDO) hnuaia inziaklut leh kum 2005-a Art & Culture department pawmpuiin Lily Veng Cultural & Drama Club hi din a ni a. Kum 2008-ah sawrkar laipui Ministry of Information & Broadcasting-a Song and Drama Division pawmpui ni lehin, kum hnih danah recognition hi tihthar leh thin a ni. Grade ‘A’ artiste an ni ve tawh a. Kum 2010 khan Ministry of External Affairs hnuaia Indian Council for Cultural Relations-ah empanelled artiste an ni mek.
LCDC hian India ram pawnah vawi hnih, India ram chhung hmun hrang hrangah vawi 73, Mizoram hmun hrang hrangah vawi 70 leh vengchhungah vawi 199, an theihna leh thiamthil lam leh drama an lo entir tawh a. Club member-te hi Lily Veng chhung mi, mahni duhthua inpe an la thin. Tunah hian member 66 an awm a, veng hrang leh khaw hrang hrang atangin club artiste mi 50 chuang an nei deuh reng bawki. Naupang leh thalai 300 chuang hnam lam leh drama an zirtir tawh a ni.