Lirnghing thlen palha chet lak dan tur school-ah entir

National Disaster Management Authority (NDMA) leh District Disaster Management Authority (DDMA) Champhai tangdun buatsaihin Nilaini khan Champhaiah lirnghing thlen thulha chet lak dan tur nunchan zirna, District Level Mock Drill on Earthquake buatsaih a ni.
Lemchan entirnaah hian chawhma dar 11.00 ah lirnghing thlen thu siren ti riin hriattirna pek chhuah a ni a. Mock drill lirnghing nat zawng hi magnitude 7.5 a ni a, power supply tihtawp nghal a ni. DDMA buatsaih District Disaster Management Plan anga hma lak nghal niin, hemi kaihhnawih official hrang hrangte chu District Emergency Operation Centre atana ruat Circuit House Conference Hall-ah tlankhawmin hmalak dan tur an chairman, bawrhsap James Lalrinchhana hoin an rel.
Mock drill kalpuia chhiatna thlenna hmun atana ruat Springdale Academy Zotlangah chhanchhuah hna thawktuten lirnghing thlen thulha chet lak dan tur nunchan zirin chhanchhuah hna an thawk a; hemi rual hian lirnghing avanga harsatna dang thleng – Zotlang Bazar (kangmei chhuak) leh Tourist Lodge thlang New Champhai (leimin) avanga harsatna thlengte pawh buaipuiin PWD ten kawng ping an thenfai bakah kangmei chhuak Fire & Emergency Services lamin thelhin nunchan an zir. Medical Team ten hliam tuarte enkawlna an pe a, a na zualte Champhaia damdawi in hrang hrangah ambulance leh private motor remchang ang ang hmanga phurh thlen an ni. Damdawi in lama thawktute pawhin chhiatna thlen thulha chet lak dan tur inpuahchahna an entir bawk.