Lirnghinga him tur tlangrama in leh thildang sak dan inzirtir

Lirnghinga him tur tlangrama
in leh thildang sak dan inzirtir
Tlangrama in him leh tlo, lirnghin thulh pawha chhe mai lo tur in sak dan tur zirhona “Sustainable Construction and Earthquake Resistant Design of Structures on Hilly Slopes” tih thupui hmangin Zirtawpni khan Aizawlah neih a ni a, Commerce & Industries minister Dr R Lalthangliana chuan a hmanpui. Workshop hi National Institute of Technology Mizoram Civil Engineering department buatsaih a ni.
Mizoram chu tlangram a nih avangin building tam zawk hi tlang pangah sak a ni thin a, in sakna tur hmun zawl zau tha hmuh tur a tam lo tih minister hian a sawi a. Lirnghing nasa tak thlen theihna Seismic Zone V-a awm a nih bawk avangin, hetiang workshop hi Mizoramin a mamawh hle tih a sawi.
India ram hmun hrang hrang atanga institution tha leh rintlak atanga mithiam lokalte hnenah lawmthu a sawi a. Lirnghing pawh lo thleng se, building tam tak chhe tur laka inven nan lirnghing dawl zo in sak dan kan thiam a pawimawh takzet, tiin, “Lirnghing thlen tawhna ram thlirin, in sak fimkhur lo leh ngheh lohna apiangah an tuar nasa a, earthquake resistant design hmanga in sak a pawimawh takzet a, in sak kan uluk a ngai hle,” a ti.
He workshop-in a tum ber chu, khuarel chhiatna hrang hrang, a bikin lirnghing pawh lo thleng se, building tlu sawp leh chhe mai mai thei lo tur, nghet leh tlo taka sak dan inzirtir a ni.
IIT Kharagpur, IIT Roorkee, NIT Mizoram, Thapar Institute of Engineering and Tech, Tata Steel (Tata Tiscon) leh Mizoram PWD atangin mithiamte an kalkhawm a. In sak nghet leh tlo, lirnghing laka him thei tur tlangrama in in leh thildang din dan, lirnghing laka himna tur dang leh inruahman dan te mithiamten an zirtir a ni.