Lirthei endikna hmun tlawh Hremte sum chawi nuai 4.6

Road Safety Month hman mek denchhena Mizoram Road Safety Council-in ‘No Tolerance Week’ a kalpuiah dan bawhchhiate sum chawi chu cheng nuai 4.6 chuang a ni tawh a. Endikna hmun hi Transport minister Vanlalhlana chuan Zirtawpni khan a tlawh.
Mizoram Road Safety Council chuan February thla hi Road Safety Month-a hman tura a tih angin hman mek a ni a, “I him theih nan traffic rules zawm thin ang che” tih chu thupuia hman a ni.
Road Safety Month chhunga No Tolerance Week hman mekah February 15 thleng khan lirthei neitu 169 chu document fel lo vanga man niin, a hmuna chawitir 139 an ni a, fine zawng zawng belhkhawm hi Rs. 465000 a ni.
Mizoram Road Safety Council chairman, minister Vanlalhlana hian Zirtawpni khan Chanmari kawna No Tolerance Week denchhena checkpoint siam chu a hmunah kalin an hmalakna a enpui a. Transport director Er R Lalrammawia, senior SP Traffic Stephen Lalrinawma leh official dangten an tawiawm.