Lirthei hun theih lohna siam
MP inthlan kaihhnawihah inthlana duty turte chetvelna leh an tan awlsamna siam a nih theih nan SP Traffic Aizawl chuan lirthei hun theih lohna leh a kaihhnawih thupek chu sawrkar hriattirna ding lai leh dan tlawhchhanin mipui hriat tur a tichhuak.
Polling official-te lirthei chetvelnaah harsatna a thlen loh nan Polling Party Dispatch Centre leh Receiving Centre bul, hengah hian inthlan kaihhnawiha duty ni lo lirthei dah phal a ni lo tih a sawi a. April 18 (Ningani nilengin) Saikhamakawn atanga Tlangnuam field panna kawng, Kulikawn atanga Saikhamakawn CP Road-ah Hridaikawn kaltlang leh Tlangnuam field panna kawngah; Greenwood Hospital peng atanga AMC Multi Sport Complex (Brigade field) inkarah dah theih a ni lo.
April 19 (Zirtawpni tlai dar 4.00 atangin) Treasury Square -Assembly House Annex, Tennis Court kawngpui dungah, Planning & Programme Implementation office kawt, Aizawl South Treasury office kawt, CS bangla chung kawngpui dungah te; Aizawl DC office atanga main road inkar, AOC petrol pump bul Congress Bhavan bul chhukthla, Aizawl Dak Inpui office kawt, Vanapa Hall kawt, Transport office kawt, SBI Main Branch kawt, Assam Rifles Magazine Guard hnuaiah te dah phal a ni lo.
Heng tarlan tak kawngpui dunga lirthei chhia emaw bungrua emaw kawng dala awmte chu Traffic Control Room (Ph No: 0389 2313061/ 9366553559) a report tur a ni a. In report lo te chu hnuhsawn / dahsawn sak an ni dawn tih a sawi a ni.
April 19 hian polling party an rawn haw khawm dawn avangin, zan dar 6.00 atangin Zodin Square leh Raj Bhavan North Gate inkar kawng chu one way a ni anga, hmarlam atangin chhimlam pan chauhin a kal theih ang. Chhimlam atanga hmarlam pan turte chu Raj Bhavan North Gate bul atangin Tennis Court/ Temple Square kaltlangin an kal thei a ni.
He thupek hian chhiatrupna thil, kangmei leh emergency kaihhnawiha duty, dan leh thupek pawimawh bika police leh magistrate duty-te leh polling party, Assembly Annex leh DC office-a kal turte chetvelna a huam lo a. Thupek zawm lo chu MV (Amendment) Act 2019 Section 177 hmanga hrem an ni dawn tih a sawi a ni.