Lirthei kaihhnawih chetsualnaah 4 thi
Lirthei kaihhnawih chetsualnaah 4 thi
March 14 leh 15 khan hmun thuma lirtheia chetsualna kaihhnawihah mi pali an thi.
March 15 zan dar 10.50 vel khan Thenzawlah scooter pakhatin kawngsira kal mi pahnih a su a, a sut zinga pakhat leh a sutu hi an thi. Thudawn danin, kawngsira thian pathum kal zing ami C Lalrinsanga (36) s/o Duhthanga, Thenzawl Farm Veng chu scooty-in na takin a su a, a hliam tuar loin hemi zan dar 11.00 vel hian Thenzawl damdawi inah a thi. Scooty khalhtu Lalnunhlima (19) s/o Kheilmena, Thenzawl Hermon Veng pawhin hliam na tak tuarin Thenzawl damdawi in atangin ZMC&H Falkawn panpui a ni a, Pathianni zing dar 4.00 vel khan a hliam tuar loin a thi ve leh a ni.
Tuna intihpalhna lai hi kawngpui a mar tha a, lirthei chesual an awm fo tawh a, nunna pawh 9-in an chan phah tawh tih thu dawn niin, heng zinga pathum hi kawng kal lai, lirthei tlan chak lutukin a suthlum an ni. Hei bakah hian nunna channa thleng lo, hliampui tuar awmna leh chetsualna tenau dang a thleng nual tawh tih sawi a ni.
March 14 zan dar 7.00 vel khan Chhiahtlangah scooter a chesual a, a khalhtu Malsawmkimi (17) d/o Lalhminghlua Chhiahtlang chu a hliam tuar loin a thi. Thudawn danin March 14 zan hian Malsawmkimi thiannu in scooty khalh a zir a, a ni hian khalhsak ve chhinin kopang su in a chesual zui ta mai tih sawi a ni. A thiannu zualko chhung hian Aizawl lam pan lirtheiin side drain-a a lo mu reng hmu in an bawihsawm a, Serchhip damdawi in panpui a nih hnu ah ZMC&H Falkawn pan tura an tih angin an kalpui a, kawng lakah a hliam tuar loin a thi a ni.
March 14 zan khan Lalawmpuia (30) s/o Laldingliana (L), Zemabawk chu Lunglei district Tawipui North-II huamchhungah ama khalh truck a chetsual pui a, a hmunah thia hmuh a ni. Thudawn danin Lalawmpuia hi amaha chuang a ni a, March 13 chawhnu dar 3.00 vel kha chuan a thianten an la be pawp a, hemi tlai lamah hi chuan biak tlang theih a ni tawh lo. Zan dar 10.30 velah chetsual thu hi hriat a ni a, a chetsual hun hi khaw en lai nia ngaih a ni. Metre 200 dawn a lum nia sawi a ni.
An ni bakah hian March 13 zan dar 6.40 khan Khawruhlian daiah Bolero chesualin mi chuang PWD thawktu zingah lirthei khalhtu Lalnunmawia, Aizawl Venglai leh junior engineer Biakzuala, Electric Veng Aizawl chu a hmunah an thi. A chuang dang, senior EE RC Lalramzauva leh SDO C Vaninmawia ten hliam an tuar bawk.