Lirthei la tlan tluang lo

Lirthei la tlan tluang lo
Kawnpui leh Khamrang inkar kawng siam vanga lirthei an tlan loh hnuah August ni 8 zan atangin he kawngah hian lirthei an tlan leh a, mahse an tlan tluang tak tak rih lo.
Lirthei khalhtute sawin danin, a chhuk lam leh a chho lam an thang rei ve ve a, rei tak tak an la ding. Kawng a tha lo a, a nal bakah a khuar. Lirthei pakhat tang se, rei lo te chhungin lirthei tam tham tak an din a ngai nghal thin.
Truck ruak, Aizawl atanga Nilaini-a chhuak, Zirtawpni tlai lama Khamrang-a la ding te pawh an awm. Truck khalhtute sawi danin, Ningani zan dar 8 vela Kawnpui atanga chhuak, zanlai dar 2 vela Aizawl thleng an awm a, anni hi a tlan tluang pawl an ni ang.
August ni 8 zan tira lirthei an tlan khan rei lo teah kawng hi a chhe leh nghal deuh mai a, lung vawm khawm kha an rah keh a awm bakah an rah avanga pawk chhuak te a awm tih an sawi. Ruah a surin a diakin a nal a, khua a rovin a khu an ti a, kawng siam hnuah tluang taka tlan a la awm lo an ti.
Lirthei ding, thui tak tak intlar an nih avangin an din chhan an hre chat chat bik lo a, kawng siam vanga an din chang te, lirthei tang a awm avanga an din chang te a awm tih an sawi.
Mizoram Truck Drivers Association hruaitute chuan Khamrang leh Kawnpui inkarah traffic a jam thin tih an sawi a, August ni 9 leh a tuk Chawlhni te pawh khan a jam nghal a, kawng pawh a chhiat thu, mahse a ziaawm a, truck tlu a awm rih lo tih te The Aizawl Post an hrilh.