Lirtheia eizawng pawlten kawng thawm that fel hmaa lirthei zawh tir pawi an ti

Kawnpui – Sairang kawng thawmthat hna chak leh felfai zawka thawh a nih theihna atana lirthei tlan an chawlh lai a, duh ang taka kawng thawmthat a nih hmaa thuneituten lirthei an tlantir chu pawi an tih thu lirtheia eizawng pawlte chuan an sawi a. Sawrkar inthlahdah zia tarlannaah an ngai tih an sawi. Pawl 24 telna lirtheia eizawng pawl hrang hrang Joint Committee thuchhuak chuan, lirthei tlan velten hnathawhna a tibuai nia sawi avangin, thawl leh chak zawka hna thawh theihnan August 4-9 chhung kawng siamna hun atan tlan chawlh an puang a. Kawng siam hi theih anga tam an tlawh a, an beisei angin hnathawk an tam loin hmalakna an duhkhawp lo hle rualin, pawl hrang hrang leh mipuiin tha taka an thlawp avangin lawmthu an sawi a, August 9 tlai dar 4.00 khan an titawp tih an sawi.
‘Tlan chawlh kan puan hi kan thua kan la din reng lai a, inpeih chiang loa lirthei an tlan tir mai hi sawrkar inthlahdah zia leh thil an tih mai mai zia tarlannaah kan ngai a. Rei tak tlan thei loa kan awm avang hian lirtheia eizawngte kan tap a. Lirthei lian tam zawk phei chu tlan ngam loin thla thum chuang ding tawhte an awm. Loan rulh harsa khawpin kan ding hial tawh a. Chhiah tam tak kan pe a, petrol leh diesel-ah cess 2% min laksak leh bawk hnu a, tlan ngamna kawng tha min pe theilo hi kan rum a ni. Heng kan harsatna hi min hriatsak a, thla thum tal chhiah awl tur leh chhiah pek theih loh avanga interest leh penalty chawi ngai min ngaidam turin sawrkar kan phut a. Financial insitution ho pawh kan harsatna hrethiam a, an hnena loan la te harsatna siamsak lo turin kan ngen a ni,’ an ti.
NH 108 (Sairang to Langkaih) leh NH.6 (Kolasib to Bairabi) chu tun dinhmunah duhthusam ni chiah lo mah se, sawrkar hmalaknaah lungawithlak nia an hriat rih laiin, NH. 306/06 (Sairang to Vairengte) kawng chu kawngpui pawimawh leh lirtheiin a zawh hnem ber a ni a, uluk tak leh tlan ngamna tawka siam a nih theihnan hun an pek pawh hnawhsarumin August 7-ah lirthei chhuah an ni tih a sawi a. Kawng an siam dinhmun thlirin an beisei a sang lo hle chungin, sawrkar berin tlan tir a tum tlat takah chuan Joint Committee chuan an dang loa, kawng chhe zual laiah hian backhoe loader (JCB) mai duty tir loin, excavator lian ngei lirthei tangte tanpui turin duty se an duh bakah a khuar apianga hnawhkhah nghal zel turin lung tam tawk inchhawp thei se tha an tih thu an sawi a ni.
Kolasib leh Vairengte inkar kawng kawng chu bungraw phur lirthei tana tluk hlauhawm tak tak a la awm avangin, kawng chhe zual lai hi NHIDCL-in chak zawka a siamthat theihnan hma la zel turin Mizoram sawrkar chu lirtheia eizawng pawlten nawr zui ngai kher loa hma la turin an phut tih an sawi.
Lirtheia eizawng pawlten fur chhunga Sairang- Vairengte kawng enkawl zelna tura sawrkarin hriatsak tura an duh:
8 Kawng hnawhnana lung sawrkarin a leite a hmunah lo dawngsawng-tu mumal tak awmin, lung chhia nia hmuh mai theih chu hnawl ngam turin.
8 Kawng chhe lai leh kawng tha lai hmun thenkhata tuihawk luankawr mumal lo chu kawng a tlo zawk theihnan mumal leh tha taka vil zui reng turin.
8 Kawng chhe zual laia chirh leh lung inpawlh nuaih chu kawng a tlo zawk theihnan lung hlang chauha hnawhkhat turin.
8 Side drain haina vung hmundanga paih loa kawngsira chhawp zel a ni hian kawng a ti tlo loin tuitling a siam a, kawngin a tlo loh phah avangin kawngsira leivung leh chirh chhek hi hmun dangah paih turin.