Literature han tih hi mizo tawng chuan Thu leh Hla tiin kan dah mai a, hei hian a phawchhuak zo chiah lovin ka hria a,mahse, a aia han sawifiah vak ngaihna ka hre bik lo. Literature chuan chhiar te, ziak te, hlasakte thlengin a huam thei awm e. Kan Hnam hian Thu leh hla lama miril tak tak kan nei tawh a, kan nei mek zel bawk a; hengte hi an hlu in kan hnam tan hian mi pawimawh tak an ni a. Lehkhabu ziak mite, thuziak mi leh hlaphuah thiam tak tak kan hnam hian kan nei a, mahse, kan neih tam loh zawk erawh chu chung lehkhate chhiar peih chu a ni. Mizo tawng ngei hian lehkhabu tha tak tak lehlin te, lehlin lohte pawh kan nei tawh a, nimahse a chhiar peih hi kan tlem hle thung. Hei tak hi kan ram hmasawn tawk theih lohna chu a ni.
-- Advertisement --
Social media-ah kan innghah tak lutuk avang hian lehkhabu tha chhiar hi kan peih ta lo em em mai a. |halai lehkhabu leh chanchinbu chhiar thin chu mi tlemte chauh kan nei a ni. Japan leh S. Korea hote an ramin hma a sawn em emna chhan pakhat chu an thalaiten lehkhabu chhiar an uar em em a, an inzirtir nasa bawk a ni. Keinin Korea kan entawnna chu an incheina leh engemaw mai mai hi a ni awm a sin. An thil tihthat lam entawn lo hian, a zirtur awm lo lam hi kan entawn chhung chuan hma kan sawn lovang. England ram tereuhte khuan khuti taka thil an tihtheihna chhan chu Literature lamah an hausak em vang a ni an ti thin a, hriatna buhzem tih hial an hlawh thin a nih kha. Khawvel thawnthu chuai thei lo – Romeo & Juliet, James Bond, Sherlock Holmes etc. leh poetry lar tak tak te hi English pachal kutchhuak deuh vek an ni.
Mi thenkhat chuan lehkha a zir san loh avangin an indah hniam thin a. Abraham Lincolna America President hmingthang, tun thlenga mi te ngaihsan leh mi ropui tak mai te pawh kha Primary Sikul kal chhuak lo ve mai a ni. Mahse, lehkhabu a chhiar tam em em mai a, kha khan finna leh hriatna pe in, khawvel miropui berte zingah a hlang thei a ni. Khawvela mi ropui leh thiltithei, Pathian mi hman tak takte hi lehkhabu chhiar nasa an ni thin. Billy Grahama pawh khan ‘ I kut dinglamin Bible keng la, I kut vei lamin chanchinbu keng rawh’ a ti a ni. Charles williama chuan ‘ lehkhabu hi thian nghet leh thawm zawi ber, thurawn petu fing ber leh zirtirtu dawhthei ber a ni ‘ a lo ti hial a ni.
Saptawng kan thiamloh avanga mawla inngaihna te hi bansan a ngai. Hnam changkang apiangin mahni tawng an ngaihlu. Saptawng thiam mawl deuh deuh an tam. Mizo tawnga lehkhabu ziak leh lehlin tha tak kan ngah tawh a. Finna leh hriatna nei tur khawpa chhiar tur kan ngah tawk tawh khawp mai. A chhiartu lam zawk hi kan awm loh avangin thuziak leh letlinglingtute hi an zahmawm zawk hle a ni. Mi mawlte min tifing a, kan hriatna min tihpunsaktu chu lehkhabu that e hi an ni a. Khawvel leh ramchhunga thilthlengte pawh hi Social media a innghah ngawtai chuan chanchinbua an ziah ngei chhiar hi belhchian a dawl thin. Social media ngaihthlak leh chhiar tam lutuk chuan min ti chi ai mai mai a ni.
Tun ai hian kan thalai zawkte hian lehkhabu chhiar uar ta se lang chuan kan ram kalphung hi a danglam dawrh lovang tih a sawi theih loh. Ziak leh chhiar thiam tawk tawkte pawh hian lehkhabu leh chanchinbute hi chhiar tam ila chu tun ai chuan hriatna leh finna kawngah hma kan sawn ngei ang. Kan ram kalphung te, ram hruai dan thleng hian a danglamna kan hmuh ngei a rinawm. Tunah chuan Politics kan khelh dan te thlir dante a dik tawk lo hian a lang tlat mai a. Mipui tam ber, khaw kil ber thlengin Politics chu kan hre vek a, mahse, kan hriat dan erawh; insawiselna, mahni party lo sawisel thiam thiam hi politics khel thiamah kan ngai emaw tih mai tur a ni tawh. Lehkhabu kan chhiar tam loh chuan hriatna dik lo kha kan nunah a bet reng dawn tihna a ni a, hmasawn chu a har ngawt ang.
Sap thalai ho khu chuan Rel ah te pawh hian lehkhabu an chhiar loh chuan chanchinbu hi an lo chhiar mawlh mawlh thin. Ram changkang apiangah Literature hlutna leh pawimawhzia mipui ten an hre thin. Kan ramah pawh hian Literature lama hma kan sawn a, kan thang a nih chuan thil tam tak hi inthlakthleng leh danglam dawrh thei a ni. Pawl ho leh Kohhranah te pawh hian Literature lama changtlung leh hmasawn apiang an ngelnghetin belhchian an dawl emaw tih tur a ni. Japan leh S. Korea thalaite pawhin lehkhabu an chhiar tam avanga an ramin nasa taka hma a sawn leh a thang thei a nih chuan keini Zofate pawh hian lehkhachhiar hi uarin inzirtir nasa bawk ila chuan kan ram hian hma sawn theih lohna bik tur a awm lo.
Kan ram khawpui hmun thenkhat tawp lutuk te hi ngaimawh tham a ni. Hengte hi hriatna leh finna kan tlakchham vang a ni. Kawnglaia bawlhhlawh paih mai mai, kuhva eina chhak mai te, kawngsir zung mai tawk leh vantlang zunin thlenga tibawlhhlawh duh kan awm hian kan changkan tawkloh zia a tilang. Incheina nalh leh fai vawr hi changkang tehna a ni ber lo. Changkanna chu chhungrila hriatna leh finna atangin alo awm thin. Kan Sikulah te pawh hian zirtirtute hian naupangteah lehkhabu tha leh chanchinbu chhiar tam a pawimawhziate hi inzirtir uar a tul khawp mai. Covid hnuah te phei hi chuan lehkha chhiarah kan thatchhe lehzual ni hian a lang a, kan ram chanchinbute chhuah hote pawh hi latu an tlahniam hle a ni. Kan ram thalaite hian nasa zawka Literature lama hmasawn turin tan i la ang u hmiang.