Liverpool 7-0 Manchester United

Pathianni zana inkhelh ngaihven hlawh takah rin lawk phak reng reng loh thil a thleng a. Liverpool chuan Anfield-a an mikhual Manchester United chu 7-0 ngawtin an lo sawp. Pathianni zana inkhel dangah him hram tuma tan khawh Everton chu Nottingham Forrest lakah uiawm takin an chak zo lo.
A mak a na, a na lutuk Ramlian….!
English club zinga ropui fal pahnih; ropui inchuh reng renga hmanhlel an nih vangin inhaw em em Liverpool leh Manchester United te chu inelna hrang hrangah vawi 239 an inhmachhawnna ni turin Anfield-ah an inkhel a. Inkhel hmuhnawm leh inhnehtawk tak tura ngaihah Manchester United anb an mualpho a, 7-0 ngawtin an hmelma lian lakah an tlawm. Tui let hnu lamah Liverpool laka an tlawm nasat ber tum an tawng hi United manager Erik ten Hag chuan mahni lu hloh ang maia na a nih thu a sawi zui hial a ni. Anfield-a an tlawmna hi United tan a nat ngawih ngawih laiin Liverpool tan erawh chuan champion tluk hlimawm, an kum khaw sawizui tur tling a ni ve thung.
EPL season kal meka beiseiphak lo Liverpool hian an elpui lian Manchester United lakah bul an tan tha a, ball chang tam zawkah an tang ngar ngar. Ball chang tlem zawk ni mah se United nawr let a hlauhawm viau zel thung a, chawlhlawk thlengin chak tur zawk rin thia a har hle. Chawlhlawk hmaa goal khat thun Liverpool chu chawlhlawk hnu lamah ropui chungchuang takin an inlan a, United an awp bet ta hmiah thung.
Liverpool tan hian minute 43-naah khel tha tak Cody Gakpo chuan mawi takin a pet goal a, hmahruaina goal a thun. Chawlhlawk hmain goal khat chauh thun mah se Reds hian second half-ah goal an thun leh thuai. Minute 47-naah Elliott siam sak tha tak chu Darwin Nunez chuan hnaite atangin a tauh goal a, an goal hnihna a thun. Si hniha hma an hruai hnu lawkah Reds in goal an thun belh zui leh thuai a, minute 50-naah Gakpo chuan mawi leh tha zeta pet goal in an goal thumna a thun. Si thum faia hma an hruai tawh bakah inkhel an thunun hneh em vangin Liverpool hi an chak ngei dawn tih a chiang tawk viau tawh, mah se, an duh tawk mai lo.
Minute 66-naah Mohamed Salah chuan awlsam takin a pet goal a, an goal lina a thun. Minute 75-naah Nunez chuan an goal ngana a thun zui leh a, United an hnual tak zet tawh. Tha tho taka inlan Reds hian tha zetin an khingpuite an nawr tlang leh a, minute 83-naah Salah chuan chiang zetin a pet goal a, an goal rukna a thun. 6-0-a hma an hruai chiah hian comentator chuan thu mawi tak a rawn chhawpchhuak a. “Liverpool six, United Sick” a rawn ti. He comentator thu sawi hi a lar zui viau nghe nghe. United nat leh zualna thlen turin minute 88-naah Roberto Firmino chuan Liverpool goal sarihna a thun zui leh ta cheu a. Tuilet hnu lamah United an hneh chianna ber ni turin Anfield-ah ngei 7-0 in an chak zui ta a ni.