Liverpool an tlawm leh tawh

Thawhtan zana English Premier League inkhel awmchhunah champion thar Liverpool chu Brighton & Hove Albion hneh lovin an tlawm. Liverpool lakah an chak vangin Brighton hian Europa Conference League khelh phak beiseina tlem an la nei.
American Express Stadium-a lenglut Liverpool hian bul an tan tha a, goal an thun nghal thuai. Inkhel tan atanga minute 9-na lekah Harvey Elliott chuan hmahruaina goal a thun nghal. Team lian lakah goal chhuah nghal thuai mah se Brighton an buai rei lova, an mualah tha takin an inlan. Brighton tan hian Yasin Ayari chuan minute 32-naah goal thunin an si phurh a sut.
1-1 a nih hnuin inkhel a hmuhnawm leh zual a, goal thun tuma tan khawh Liverpool in goal a thun belh zui leh. Chawlhlawk dawn hnaih minute 45+1-ah midfielder chetha tluang tak Dominik Szoboszlai chuan hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah Brighton an khel tha leh zual a, goal hnih thunin an khingpuite an lehthal. Brighton tak hian Kaoru Mitoma chuan minute 69-naah goal thunin an si phurh a sut. Hun eng emaw chen goal a luh belh theih loh hnuin Jack Hinshelwood chuan minute 85-naah hma an hruai letna goal a thun. Inkhel hmuhnawm takah hi goal dang luh belh lovin a tawp a, Brighton chuan an mualah point thum hlu tak an hmu.
An mualah an chak vangin Brighton hian Europa Conference League khel phak beiseina thar an nei. Brighton hian khelh hmabak khelh khat la nei chungin point 58 an hmu a, pariatnaah an awm mek. Pariatna ni chunga season an khar a, Europa Conference League-ah Chelsea an champion hlauh a nih bawk chuan Brighton ian Europa Conference League an khel pha dawn. Pariatna ni chunga season an khar pawh ni se final-ah Chelsea in Real Betis an hneh lo a nih chuan Brighton tan Europa Conference league khelh a harsa dawn thung.
Liverpool hi khelh hmasak pali nei chungin EPL-ah an champion a, an champion hnua an match hnuhnung vawithumah an chak miah lo thung a, point hnih chiah an la hmuh belh. EPL ah Champion hnua khelh thum chhung hnehna chang thei lo awmchhun an ni a. A chhe zawngin EPL record an siam.