Liverpool in last 16 an hnaih

Nilai zan khan UEFA Champions Lea-gue 2025-26 khelh chhunzawm a ni a, Liverpool chuan mikhual an nihna hmunah awlsam takin hnehna an chang. Mimualah hnehna an chan vangin Reds hi palinaah an inhlangkai a, last 16 an hnaih viau tawh. Liverpool rual hian Newcastle United leh Chelsea te pawhin hnehna an chang ve bawk. Kar laihawla champions League khelhah English club ziga chak lo awmchhun chu Manchester City chiah an ni.
Marseille lakah Liverpool an chak nuamsa
English Premier League-ah result nei tha hlei thei lo Liverpool hi Marseille hmachhawn turin Stade Vélodrome ah an lenglut. Mikhual an nihna mualah an khel tha viau a, 3-0 ngawtin hnehna an chang. Reds hian French Ligue 1-ah pathumna ni mek Marseille lakah nuamsa takin hnehna an chang a ni ber mai.
Liverpool hian mikhual an nihna hmunah bul an tan tha viau a, inkhel tir lamah middfielder Alexis Mac Allister chuan goal thun theihna hun tha a nei a, per arh hret vangin a hun tha a hloh. Hemi hnu lawk hian Hugo Etikite chuan goal a thun leh a, he goal hi offside vagin hnawl a ni leh bawk. An hun tha an hlah zawn hnuin Liverool hian goal an chuah teuh hle a, Alison chetthat zarh an him hram chauh. Inkhel hmuhnawm takah goal a luh theih loh reng hnuin Dominik Szoboszlai chuan minute 45’+1-ah fing zetin free kick a chhuih goal a, hmahruaina goal a thun. Szoboszlai goal thun hmang hian Reds in 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal a luh belh lawk thei lo. Liverpool in an hun tha hlah a, goal bar an pet per dawp hnuin hun tha an nei zui leh a, an vannei ta nge nge. Marseille player Gerónimo Rulli chuan minute 72-naah an lamah a dang pial lut a, Liverpool goal hnihna a thunsak.
Si hniha hma an hruai vangin Liverpool an phur a, inrintawkna sang zawk nen mikhual an nihna hmunah an inlan chhunzawm theih phah. Si hniha hmahruai tawh Reds hian goal thun belh tumin tan an khawh zui char char a, hun pek belhah an vannei leh ta nge nge. Cody Gakpo chuan Gravenberch hnen atanga ball a dawn tha tak chu lei hrulah mawi takin a pet goal a, minute 90’+2 naah an goal thumna thunin, an hmahruaina a tizau. Gakpo goal thun hnuin goal dang a luh belh thei tawh lova, Liverpool chuan mikhual an nihna hmunah nuamsa takin hnehna an chang ta a ni.
’Marseille sawptu Liverpool hian khelh sarih atangin point 15 an hmu a, palinaah an inhlangkai. Palina an nih vangin Reds hian last 16 an hnaih viau tawh. Kar tharah Qarabag an hmachhawn zui leh dawn a. Anfield a inkhel tur an nih vangin Liverpool hian chak theihna hun tha tak an nei. UCL-ah hian League round-ah bik table-ah 1-8 thlengin direct in last 16 an lut a. Team 16 dangin last 16 lut tur zawnna play-off an hmachhawn zui leh a ngai dawn. Palinaa awm mek Liverpool hian play-off khelh ngai lova tlin theihna chance tha tak an nei.
Marseille an hmachhawn tum hian Mohamed Salah chuan Liverpool tan a khel leh thei tawh a, bul tanin a khel tha viau nghe nghe. Manager Arne Slott pawhin Salah hi a fak viau nghe nghe a ni. Marseille an hmachhawn tum hian Virgil van Dijk pawhin Liverpool tan a game 350 na a khel ve chiah bawk.
Newcastle an chak awlsam
Nilai zana inkhel dangah Newcastle United hi an mualah awlsam takin hnehna an chang a, St James Park-a an mikhual PSV Eindhoven chu 3-0 in an sawp. An muala chak Newcastle hian last 16 luh ngei tumin tan an khawh zui leh ang.
Newcastle hian St James Park-a an mikhual PSV lakah bul an tan tha viau a, goal pawh an thun hma hle. Inkhel tan atanga minute 8-na lekah Yoane Wissa chuan Joelinton siamsak atangin hmahruaina goal a thun nghal. Hma takah goal an thun vangin an phur a, an mualah ngei inrintawkna sang zawk nen an inlan.
Hma takah goal an thun hnuin Magpies hian an mikhualte an nawr zui na viau a, chawlhlawk hmain goal dang an thun belh leh. Anthony Gordon chuan minute 30-naah Wissa siamsak atangin an goal hnihna a thun zui leh a, an hmahruaina a tizau. Gordon goal thun hnu hian goal dang a luh belh thei mai tawh lova, Magpies in 2-0 a hmahruai chungin chawlhlawk an hmang.
Chawlhlawk hnu lamah Newcastle an khel tha chhunzawm a, goal khat an thun belh leh. Minute 65-naah Harvey Barnes chuan an goal thumna thun a, a tawp a khar. Newcastle hian an mikhual PSV lakah 3-0 in hnehna an chang a, point thum an hmuh belh.
PSV laka chak Newcastle hian khelh 7 atangin point 13 an hmu a, pasarihnaah an inhlangkai. PSG, Manchester City, Barcelona, Atletico Madrid, Chelsea leh Sporting CP te nen point 13 theuh an hmu a. League round khelh khat la awmah pa 7-na leh pa 8-nah an inchuh nasa zui hle ngei dawn. League round-a an match hnuhnung berah Newcastle hian champion lai PSG an hmachhawn a ngai dawn a, direct a last 16 lut thei turin Parc des Princes-ah fiahna hautak an paltlang a ngai dawn.
Chelsea pawh an chak
Liverpool leh Newcastle United te rualin Chelsea pawhin hnehna an chang a, Stamford Bridge-a an mikhual Pafos chu minute 78-naa Moisés Caicedo goal thun hmangin an hneh hram a, manager thar Rosenior hnuaiah hnehna an chang zawn. Chelsea hian Napoli an hmachhawn zui leh ang.