Liverpool in Real Madrid an hneh

Nilai zan khan UEFA Champions League 2024-25 khelh chhunzawm a ni a, Anfield a inkhel ngaihven hlawh takah Liverpool chuan si hnih faiin champion lai Real Madrid an hneh. Reds an chak laiin Aston Villa chu uiawm takin an chak zo lo thung.
Liverpool leh Real Madrid te hi ineltawk tak an nih vangin an inkhel tur hian ngaihven a hlawh hle. Champion lai Real Madrid hi a khelh that lai a ni lova, Liverpool erawh manager thar Arne Slot hnuaiah an vul em em thung. Reds hi English Premier League leh Champions league-a hmahruaitu an nih vangin an mualah chak thei ngei tura ngaih a ni. Rinlawk ang ngeiin Liverpool hi an mualah an khel tha viau a, ball pawh an chang tam fal. Real Madrid in Anfield-ah ball an chang tam viau a, penalty an hmuh pawh Mbappe-a’n a la thelh hram bawk.
Liverpool hian an mualah khel tha viau mah se goal erawh an thun thei mai lo thung a, chawlhlawk hmain goal lut a awm thei lo. Chawlhlawk hmain goal thun thei lo mah se chawlhlawk hnu lamah Liverpool in goal an thun ta thuai thung. Minute 53-na lekah Alexis Mac Allister chuan hmahruaina goal a thun. Hmahruaina goal an thun hnuin an Reds an khel tha zui viau a, an mikhualte an nawr tawm thei hle. Khel tha tak Liverpool tan hian Cody Gakpo chuan minute 76-naah an goal hnihna thunin an hmahruaina a tizau zui leh bawk.
He inkhelah hian Liverpool defender Andy Robertson chuan penalty a chawi. He penalty hi Kylian Mbappe chuan a thelh tlat thung a, an si phurh a sut then thei lo. Penalty chawitu Robertson chuan an si nghak Alisson-a’n tihtur a neih loh em vanga tih tur siamsak ve mai a nih thu fiamthuin a sawi zui. An mualah an chak leh tak vangin Liverpool hian UCL-ah vawi 5 kheli point 15 an hmu a, season tharah an la chak fai vek. Reds hi UCL season kal meka chak vek thei awmchhun an ni a, an hnuaichiahah hian tlawm nei lova kal tluang mek Inter Milan an awm ve bawk. Liverpool in hma an hruai chhunzawm laiin champion lai Real Madrid hi 24-naah an awm ve thung. An dinhmun chhe rih viau mah se Real Madrid manager Carlos Ancelotti chuan season dang ang bawkin last 16 an luh leh ngei tur thu a sawi a. An ropuina UCL-ah ropui nawn leh turin a la inring tawk hle.
An mualah EPL club lian Liverpool an chak laiin Aston Villa erawh chu an mualah uiawm takin an chak zo lo thung. Villa hian Italian Serie A club lian Juventus an mikhual. An mikhualte nen hian an inhnehtawk viau a, goal pawh a lut har hle. Hun pangngai tawp hnu, hun pek belhah Villa tan hian Morgan Rogers chuan goal pawimawh tak a thun. VAR rawn a nih hnuin Morgan Rogers si si nghak Michele di Gregorio lakah a foul tih hmuhchhuah a ni a, he goal hi hnawl a ni. Rogers goal hnawl a nih vangin Villa hi uiawm takin an chak zo ta lo a ni.
An mualah chak zo lo mahse Aston Villa hian pakuana an la luah phak a. Juventus erawh chu 19-na daihah an awm ve thung.
Nilai zana inkhel dangah PSV Eindhoven chuan an mikhual Shakhtar Donetsk an lehthal a, point thum hlu tak an hmu. PSV Muala lenglut Shakhtar tan hian Danylo Sikan chuan inkhel tan atanga minute 8-na lekah hmahruaina goal a thun a. Oleksandr Zubkov chuan minute 37-naah an goal hnihna a thun zui leh a, 2-0 a hmahruai chungin chawlhlawk an hmang.
2-0 a hma an hruai laiin Shakhtar Donetsk an chesual a, Pedrinho chu minute 69-naah hnawhchhuah a ni. Tam zawk an nih hnuah mualneitu an phur thar viau a, hun tawp dawn hnaiah goal thum thunin an mikhualte an lehthal ta hial. PSV tan hian Malik Tillman chuan minute 87-naah goal thunin an si phurh a sut a. An si phurh sutna goal an thun atanga minute thum hnu lekah Tillman hian goal thun zui lehin an si phurh a sut zo. An si phurh an sut zawh hnuin an phur viau a, Ricardo Pepi chuan minute 90’+5-naah hma an hruai letna goal a thun a. An mualah mak leh ropui taka hnehna changin point thum hlu tak an hmu zui ta a ni.
Nilai zana inkhel dangah Borussia Dortmund in mualneitu Dinamo Zagreb chu 3-0 in an hneh a, Red Star Belgrade in 5 – 1 an an mikhual VfB Stuttgart an hneh laiin Benfica chuan 3-2 in mualneitu AS Monaco an hneh ve thung.