Liverpool leh City an chak
Pathianni zan khan English Premier League-ah inkhel pathum a awm a. Team lian Liverpool leh Manchester City ten hnehna pawimawh an chang a, point thum an hmu. Sheffield United hnehtu Manchester City chuan West Ham United an lehpel a, EPL hmahruaitu thar an ni.
Liverpool in Newcastle an lehthal
Champion tura rinkai zinga mi Liverpool chu team tha Newcastle United hmachhawn turin St. James Park-ah an lenglut a. Mikhual an nihna mualah goal an chhuah hmasak bakah hma takah an captain Virgil van Dijk hnawhchhuah a ni bawk a, dinhmun chhe takah an ding hman. Newcastle lakah chak zo lo tura ngaih ni hman mah se hun tawp dawna Darwin Nunez goal hnih thun hmangin hnehna an chang let a, point thum hlu bik an hmu.
Champions League khel tur Newcastle hian an mikhual Liverpool lakah an khel tha a, minute 25-naah Anthony Gordon chuan hmahruaina goal a thun. Hmahruaina goal an thun hnu lawkah Liverpool captain Virgil van Dijk chu Alexander Isak lakah hlauhawm taka a chet vangin hnawhchhuah a ni a, Liverpool dinhmun a chhe leh zual sauh.
Si phur leh tlem zawk an nih hnuin Liverpool huaisenzia a lang a, an khel tha sauh teh tlat. Huai takin an khingpuite an nawr a, inkhel hmuhnawm an lantir. Ngam takin an khingpuite nawr mah se goal erawh an thun har hle thung. Hun tawp dawn hnaiah manager Jurgen Klopp chuan Darwin Nunez a luhtir a, a tifuh hle. Nunez hian minute 81-naah goal thunin an si phurh a sut.
Nunuz goal thun hnuin Reds an phur leh zual a, an khingpuite an nawr na sauh bawk. Season liam taa palina Newcastle lakah tlawm an pumpelh pawhin an tan result tha a nih tawh laiin result tha zual zawk neih ngei an tum a, an thla an thlah lo. Hun pangngai tawp hnu, hun pek belh minute thumnaah Mohamed Salah siamsak atangin Nunez chuan hma an hruai letna goal a thun leh ta mai a. Nunez goal hnihna hi an chakpui a, point thum hlu bik hmuh nan an hmang zui ta a ni.
Season liam taa beisei phak lo Liverpool hian season tharah bul an tan tha a, vawi thum khelin tlawm an la nei lo. Khelh thum atanga point 7 hmuin palinaah an inhlangkai. Hetih lai hian season liam taa khel tha tak Newcastle United erawh chuan bul an tan tha lo viau a, vawi thum an khelh tawhah vawi hnih ngawt an tlawm tawh a, 13-naah an awm mek.
Harsa takin City an chak
Champion lai Manchester City chu Bramall Lane-ah lenglutin Sheffield United an hmachhawn a, hun tawp dawn tepa Rodri goal thun hmangin City hian harsa takin hnehna an chang.
Bramall Lane-a lenglut City hian an khel chhe hran lo viau a, chawlhlawk hmain goal thun theihna hun tha an hloh. Minute 35-naah Erling Haaland chuan penalty a pet goal lo teh tlat a, goal post a pet per. Haaland hian City tan EPL-a penalty a pet hmasak pasarih a pet goal vek a, Sheffield United lakah a thelh tha City tan a thelh hmasak ber a ni.
Chawlhlawk hmain penalty thelh mah se Haaland hian minute 63-naah Jack Grealish siamsak a tauh goal a, hmahruaina goal a thun ta tho thung. Champion lai lakah goal chhuah hmasa mah se Sheffied United in goal thun tumin an mikhualte an nawr a, an hlawhtling. Minute 85-naah Jayden Bogle chuan goal thunin an si phurh a sut.
Hun tawp dawn hnaihah 1-1 a nih vangin City in goal thun tumin tan an khawh zui leh chiam a, minute 88-naah khel tha tluang tak Rodri chuan hma an hruai nawn lehna goal a thun a. He goal hi chakpuiin, point thum an hmu zui ta a ni. City hi EPL season tharah vawi thum chak zawn thei awmchhun an ni a, khelh thum atanga point 9 hmuin EPL hmahruaitu thar an ni nghal bawk.
Sheffield United an hneh kha Pep Guardiola-a’n EPL-ah vawi 200 City a chakpuina chiah a ni a. Manager zingah EPL-a vawi 200 chak tling rang ber record thar a siam. Pep Guardiola hian EPL-ah vawi 200 City chakpui turin khelh 269 chiah a mamawh a. Sir Alex Ferguson-a record khelh 322 atanga vawi 200 chak chu a khum ta a ni.