Living museum leh a behbawm…

Art & culture deptt buatsaihin tun hnai khan Falkawna Zokhua-ah art & culture minister C. Lalsawivunga chuan ‘Living Museum’ a hawng a.
Living museum-in a tum deuh ber chu, Mizo pipute khawsak phung leh an khawlai nun te, ei leh in chi hrang hrang a taka hmuh theih leh chen theiha chhawp chhuah a ni. Hei hi zinmite mit tihtlaina leh intihhlimna tur a nih rualin, Mizo hnam ziarang vawrh darhna remchang tak a nih bakah, thangtharte’n pipute khawsak dan leh nunphung an hriat thar nan te, Mizo tualchhung mite leh thalaite tana tourism lama sum lakluhna hnar atan te a ni.
Museum chu kan hria a, hnam ziarang hrang hrang lantirna hmanrua, bungrua, silhfen etc. hmun pakhata pholanna hmun a ni a. Living museum a nih chuan, heng hmanlai pipute chenna hmun, hnam ziarang leh hnam thil a taka mihringin kan lanchhuahtir leh kan entirna hmun hi a ni.
Tuna bul tanna turah hian, November thla chhunga Inrinni vawi thum chhung neih phawt tur a ni a. Mizo khawtlang nun, hnam lam leh zai, hnam infiammna, hnam ei leh in leh hnam incheina chi hrang hrangte entir a ni thin dawn a ni.
Mizo khawtlang nun phochhuah danah hian, hnam lam ringawt te, zai ngawng ngawng ringawt te ni mai lovin, hnam ziarang phochhuak tura a tahtawla Mizo inrelbawl dan leh khawsak phung hi tihlan ni thei se a duhawm hle. Lal leh a khawnbawl upate rorel dan te, tlangau hmanga information hrang hrang inhrilh darh a nih dan te, zawlbuk nunchan te, nula rim leh pawnto, eirawngbawl dan te, chhungkuaa chaw ei lai te, hetiang hian a tahtawl deuha kalpui theih ni se a duhawm hle a ni.
Living museum ang hi tunhma atang tawhin neih ve rawtna kha a awm thin a, a bikin Reiek tourist resort-ah. Reiek hi Mizoramah chuan khualzinte tlawh hlawh ber pakhat a ni a, living museum neih nan a remchang em em a. Tuna resort awm mek hi nasa taka tih len ni se, zan riaka awm chilh duh khualzin hi an pung chho zelin a rinawm a, zan lamah pawh tual mei chhem (campfire entertainment) hun hlimawm tak pawh buatsaih theihna tur a ni.
Rel a lo luh thuk tak avang hian khualzin pawh an pung chak chho zel dawn a, hei hi kan lo chhawr tangkai thiam chuan, tunhmaa ‘tourism industry hi kan state economy chawikang dawrhtu a ni thei’ tia sawi thin kha a thleng dik chho thei dawn tihna a ni awm e.