Living Musuem kum khatnaah tlawhtu mi 9600 an tling tawh

Living Musuem kum khatnaah
tlawhtu mi 9600 an tling tawh
India rama hmasa ber leh awmchhun, Art & Culture department-in Zokhua (Mizo Typical Village) Falkawn-a chawlhkar tin Inrinni apianga an buatsaih Living Museum chuan kum khat a tling ta a. Inrinni khan Art & Culture deputy secretary Lalengvari, I&PR director Mina Zoliani Joute leh official dangten an tlawh.
Living Museum hi ram chhung leh ram pawn atangin tlawhtu an thahnemin ngaihhlut a hlawh hle a, a bikin ram pawn atanga lokal tourist-ten an tlawh nasa hle tih sawi a ni. Zokhua Falkawn hi kum 1992-a dina ni a. Tunhnaiah Mini Live Museum atana buatsaih niin, hmanlai kan pipute hunlaia Mizo khua anga siam leh cheibawl a ni.
Kum 2011 khan a vawikhatna atan hmanlai Mizo nun a taka entirna – ‘Live Demonstration of Mizo Typical Life’ neih niin a hming atan “Mizo Nun Kutpui” tih a ni. Kum 2023 khan India ramin G-20 Summit a thlen denchhenin Summit palaite pual leh Chapchar Kut lawmna pakhat atan ni thum chhung neih leh a ni a, a hming atan “Zonun Kutpui” tih a ni. Kum 2024, 2025 leh 2026 khan Chapchar Kut pualin ni hnih chhung hmanlai Mizo nun entirna hi buatsaih a ni tawh bawk.
Thangthar leh naupang zawkten Mizo nun zemawi leh chin dan hrang hrang a taka an hmuh leh an tem chhin a, zirlai naupangte tana tangkai leh an zirlaibua awm an hriatthiam lehzual theihnan, khualzin lo pung zelten kan hnam nun an hmuhfiah theihna atante Art & Culture department chuan kartin Inrinni apiangin ‘Hmanlai Mizo Nun Entirna – Living Museum’ hi 2025 October 25 atang khan a buatsaih a. Tun thlengin tlawhtu mi 9600 an chuang tawh a, a zatve vel hi rampawn atanga tlawhtu an ni.
Mizo nun dan hrang hrang – hnam lam leh zai bakah infiamna, chawhmeh leh ei tur dang, inthuam dan leh nitin nunphung thenkhat entir a ni.
Living Museum hi Art & Culture department bultumin Falkawn khuaa YMA, MUP leh MHIP nen thawhhona tha tak neia kalpui a ni.