LMC-ah property tax floor rate 3.42%

LMC-ah property tax floor rate 3.42%
Lunglei Municipal Council (LMC) Board of Councillors (BoC) chu an chairman Lalzuithanga kaihhruaiin March 21 khan an thukhawm.
Kum 2025- 2026 chhunga property tax floor rate atan kum 2024- 2025 a hman lai 3.42% chu hman rih nise, an ti a. Kum 2025-ah Krismas bazar siam nise tiin, ruahmanna siam turin Task Force Committee on Krismas Bazar an din nghal. 2025 Krismas vuakvetah LMC huamchhung veng hrang hrang tan khawlai leh kawnchei inelna buatsaih relin, pakhatna cheng nuai 3, pahnihna nuai 2, pathumna nuai 1 leh veng pathum tan consolation prize Rs. 30000 theuh ruahman nise, an ti bawk.
BoC thukhawm chuan mela, flying business, road show, exhibition, music festival leh a kaihhnawih chu LMC Licensing Regulations 2024 hnuaia rinluh belh a nih angin, phalna pek leh khuahkhirh kawngah a tul anga hma lak zui nise, an ti a. LMC Display of Advertisement & Hoardings Regulations 2024 hnuaiah kum 2025- 2026 atangin hoarding chu tender system-a kalpui relin, LMC huamchhunga veng hrang hrang chu zone-a then a, hoarding leh no hoarding zone kalpui tum a ni.
Lungleia park awm – Laldenga Park, District Park leh Lunglei Park chu LMC hnuaia enkawl a nih theihnan leh Lunglawn rama Solid Waste Management Centre sak mek chu a hma thei ang bera zawh a nih theihnan hma lak an rel a. LMC Award (ward fai inelna) chu endik zawh tawh a nih angin, a hma thei ang berin lawmman sem nise an ti.
LMC BoC chuan LMC huamchhungah pawl leh mimal anga lei hnuaia tui verh chu khap tha tiin, sawrkar dan awmsa zulzuia hma lak zel dan tur zirchian a, ennawn leh nise, an ti. LMC huamchhungah chhiarpui (demographic census) buatsaih a nih theihnan Directorate of Economics & Statistics dawr a, a tul anga bawhzui leh hma lak an rel bawk.