LNG phur Russian lawng pil, Ukraine kahah puh

Russia lawng, liquefied natural gas (LNG) phur chu Nilaini khan Mediterranean-ah a pil a, Moscow chuan Libya atanga Ukrainian drone hmanga kah chhuah hmanga beih vangah a puh.
Arctic Metagaz hi Thawhlehni khan Libya leh Malta inkar tuipuiah nasa takin a kang niin Libya maritime rescue agency chuan a puang niin Reuters-in a tar lang.
“Kan hriat dan chuan tanker hi na taka puakin kangmei nasa tak a chhuak zui a, a pil ta vek a ni,” tiin agency chuan a sawi.
Ukraine hian Russia-in indona atana sum hman tur a neihna ber, an tuialhthei sawngbawlna leh energy hmunhma dangte a bei fo va; mahse, tun tum hi an tih a nih chuan LNG phur lawng a beih hmasak ber a ni ang.
Russia transport ministry chuan tanker hi Arctic lawng chawlhhmun, Murmansk atanga LNG phura chhuak niin Libya tuipui kam atanga Ukrainian naval drone kahchhuah hmanga beih a nih thu a sawi a ni.
Lawnga thawktu mi 30, Russian vek chu him takin an awm vek a, Malta chhanchhuah hna thawktuten an la chhuak a, an chungah lawmthu an sawi.
“He thil thleng hi khawvel huap firfiakna chetna leh tuipuia mi suama chetna, khawvel puma tuipuia dan zam bulpui bawhchhiatna tling a ni,” tiin ministry chuan a sawi.
Libya-a National Oil Corporation chuan lawngin chhiat a tawhah hian inhnamhnawih an nei lo tih a sawi a, Egypt-a Port Said pan tur a nih thu an sawi bawk.
Lawng pil chungchangah hian Russia-a LLC SMP Techmanagement manager leh Russian LNG siam chhuaktu, Novatek chuan engmah sawi an la nei lo.
Libyan agency hian lawngte chu heng lai hmun hi pumpelh turin a ti a, he hmuna boruak bawlhhlawh awm apiang an hnena thlen turin a ngen a, lawnga tuialhthei phurh zat leh awm zat hriat an duh nia ngaih a ni.