Local Council aiin Village Council team

Mahindra XUV3OO LPS Cup-ah final lut ngai lo ve ve Sihphir Venghlun leh Kawnpui Joint-in zanin dar 8 atang hian RG Stadium, Mualpuiah trophy an inchuh dawn a, a hlut dan a danglam bik dawn.
Aizawl District Football Association chuan NECS Cup hming chawiin 2013 atanga 2019 thlengin kum tinin khua leh veng inelna vawisarih a huaihawt tawh a, tualchhung football-a hriat hlawh Aizawl veng liante’n thununin, Ramhlun South vawithum an champion bakah Armed Vengin trophy tum hnih lain, vawikhat ve ve Chhinga Veng leh Bethlehem Vengthlang an champion bawk.
Kum nga hnuah tharthawh lehin Aizawl district pawn atangin sawm bik team pali an tel a, chu’ng zinga mi Kawnpui Joint leh Sihphir Venghlunin hmawr an bawk dawn a ni.
Team pahnih hi khua leh veng inelna liana hriat hlawh tham sulhnu la nei lo ve ve an nih avangin an khaw chanchina hlutna danglam tak nei inkhel an hmachhawn dawn a ni.
Kum 1985 atanga 2023 thlengin khua leh veng inelna lian leh hlun YMA football tournament vawi 21 a awm tawh a; kum 2006 khan Lengpui an champion a, Aizawl pawn atanga champion thei awmchhun an la ni.
Kum 2022 khan Mizoram Football Association-in ram pum huap khua leh veng inelna huaihawtin, Aizawl pawn team ve vein final an lut a, Champhai Kananin sihnih faiin Sialhawk an hneh.
Mahindra XUV3OO LPS Cup final-ah Sihphir Venghlun leh Kawnpui Joint an intawng ve leh dawn a, Mizoram tualchhung football-ah Local Council hnuaia awm Aizawl khawpui chhunga veng hrang hrang aiin Village Council awpna hnuaia awm khaw hrang hrangah hmasawnna a thang chakin player pawh an chhuak nasa zawk tih ngaihdan awm tawh sa nemngheh tharin a awm leh mek a ni.