Lok Sabha-ah ro la rel thei lo Mizo MP-in Manipur sawi tum

Parliament fur thutkhawm chu a ni thumna, July 24 pawh khan Manipur buaina sawi hmasak phut vangin ro an la rel hleithei lo a, Lok Sabha thutkhawma Manipur chungchang sawihona hun siam tura adjournment motion putluh tumtu Mizoram Lok Sabha member C Lalrosanga chuan, House adjourn zel ni mah se, Manipura buaina thleng chungchang hi sawichhuah a la tum zel tho tih a sawi.
Rule 56 dan anga adjournment motion putluh tumtu C Lalrosanga chuan sawrkar lamin Manipur buai chungchang hi sawiho remtih thu sawi reng mah se, eptu lamte nen sawiho an duhdan a inrem thei lo a. Prime minister-in House chhungah Manipur chungchang hi sawi tura an phut tlat avangin vawiin lamah pawh eptu lamten House rorelna kal hleithei loin an siam tih Mizoram MP hian a sawi a ni.
Manipur buai chungchang sawiho tura adjournment motion hi MP dangte pawhin putluh tumin notice pe ve tho mah se, pawm a ni ta lo a. NDA member zingah Mizoram MP pahnih bak adjournment notice pe an awm hriat a ni lo.