Lok Sabha MP inthlanah vote sing 6 chuangin hneh
Lok Sabha member seat khat awmna Mizoramah state sawrkar-a ruling party, ZPM candidate Richard Vanlalhmangaiha chu vote sing 6 chuangin amah hnaih bertu lakah a chak.April 19-a MP inthlan thawhkhatnaa tel, Mizorama vote tla hi June 4 – Thawhlehni khan chhiar a ni a. Zingdar 8.00 atanga chhiar tan niin, dar 12.00 hma in a tling tur a hriatchian hman a ni.
2023 MLA inthlanpuia sawrkarna siam tura thlantlin ZPM-in MP candidate-a an vawrhchhuah Richard Vanlalhmangaiha hian vote 208552 a hmu a; amah hnaih bertu MNF candidate K Vanlalvena chuan vote 140264 hmu in, an inthlauhna hi 68288 a ni.
Tun tum MP inthlanah hian candidate 6 an awm a. INC, MNF, ZPM, BJP leh MPC bakah independent candidate pakhat a awm a ni. Lok Sabha inthlan hnuhnung ber, 2019 ami nen khaikhin hleihtheih loh na a awm a; 2019 ah hian INC leh ZPM tangdunin candidate an neih vang a ni. BJP bik erawh 2019 inthlan aiin an vote hmuh 4826-in a pung a, 2019 inthlana independent-a ding tawh, kumin inthlana independent bawka ding Lalhriatrenga Chhangte erawh a hniam zawnga kalin, 2019 inthlan (12675) aiin kumin inthlan (4706) ah vote 7969-in a hmu tlem zawk a ni.
2019 MP inthlanah candidate zinga vote tur hre lo, vote thlak ve tho si, NOTA hmet 2509 an awm a; kumin inthlanah 1893 an awm thung.
Electronic voting machine hmanga vote thlaknaah ZPM candidate Richard Vanlalhmangaiha hi a sang fal nalh a, postal ballot hmanga vote thlakah pawh a sang fal nalh. Postal ballot ah hian vote 4640 a tla a, heng zinga 193 hi vote thi niin, vote nung 4447 atangin ZPM candidate hian vote 2175 a hmu a; amah hnaih bertu chu INC candidate niin vote 834 a hmu.
MP thar tur chuan hnehna sang tak an chang avangin lawmthu a sawi a. Mizoram mipui, an party worker, inthlan hlawhtling tak neih theihna tur thawktu zawng zawng chungah lawmthu a sawi tih sawiin, mi rilru tihnat a neih chuan ngaihdam a dil tih a sawi bawk.
“Kan hlawhtlinna hi ka mimal hlawhtlinna a ni loa, ZPM party bil hlawhtlinna pawh niloin, he ram mipui ka thawhsak turte tana hlawhtlinna a ni. Kan chief minister kaihruainain hna kan thawk chho dawn a, ka phur tawh takzet. Min beisei angin ka theihna sang ber ka chhuah dawn a ni,” Richard Vanlalhmangaiha hian a ti. NDA emaw INDIA lamah emaw a thu dawn loa, an kal dan tur chu party-in a rel anga, tunah rih chuan ‘issue base’ in an kal chho dawn tih a sawi a ni.
Candidate Party EVM vote Postal vote Total
Richard Vanlalhmangaiha ZPM 206377 2175 208552
K Vanlalvena MNF 139532 732 140264
Lalbiakzama INC 97761 834 98595
Vanlalhmuaka BJP 33009 524 33533
Lalhriatrenga Chhangte Indp 4663 43 4706
Rita Malsawmi MPC 3681 112 3793
OTA 1866 27 1893
TOTAL 486889 4447 491336