Loneitu ten sorkar ruahmanna an hnawl hmak

Centre-in thlai chi nga kum nga chhung atana minimum support price (MSP) hmanga contract system hmanga lei a rawtna chu loneitute chuan hnawlin ‘Delhi Chalo’ march chu February 21 ah an chhunzawm tur thu an sawi.
Kisan Mazdoor Morcha leh Sanyukt Kisan Morcha (Non-Political) – an hnuaia farmer’ leh farm labourer unions 200 vel awmna chuan an thil ngiat tihlawhtling tura Delhi khawpui pana kawngzawh an tumna chu chhunzawm zel an tithlu ta a ni.
“Rawtna an siam min pek te chu Pathianni a Union Minister Piyush Goyal nena meeting kan neih hnua media mite hnena a sawi dan nen a in ang lo. Kha meeting-ah khan thlai chi nga ah te MSP kalpui a ni ang tih a ni a. Mahse, Minister in meeting zawh hnuah contract system in kalpui a ni ang a ti leh si a, an thiltum lailanin a awm a ni. Minister thusawi kan ngaihtuah hnuah an rawtna te hnawl ni se kan ti a ni” tiin Sarwan Singh Pandher, coordinator of Kisan Mazdoor Morcha chuan a sawi.
“February 21 ah Delhi panin kawng kan zawh leh ang. Centre sorkar hnenah ngenna kan neih chu inbiak emaw Delhi kan pan remtiin Punjab-Haryana ramria kawngpui dangchat lo turin kan ngen a ni” tiin a sawi bawk.
Samyukt Kisan Morcha (SKM), kum 2020-21 a Centre farm law duh lova nawrhna kalpui tawhtute leh Bharatiya Kisan Union (Ugrahan) Punjab a farm union lian ber pakhat pawhin Centre rawtna chu an hnawl bawk a.
SKM te chuan Centre in loneitute nena kum nga chhung contract siama maize, cotton, arhur/tur, masoor leh urad te MSP hmanga A2+FL+50% method (input cost and family labour) a lei leh crop diversification a tih chu kan hnawl a ni. Sorkar rawtna hi loneitu tena MSPC2 (input cost and rent of the land)leh thlai tin te +50% guatantee leh legalised procurement ngiatna tihdal tumna a ni an ti bawk a.
BJP te chu inthlan dawna an manifesto tihlawhtling tura ngenin SKM leader te chuan Centre chuan an thutiam an tihlawhtling thei lo a nih chuan Prime Minister Narendra Modi chuan mipuite hnenah a puang mai tur a ni an ti bawk a. Inbiakna pawh SKM (non-political) tuna Haryana-Punjab boundary a lungawilohna lantirtute nen chauha neih pawh an duh loh thu sawiin SKM te chuan lungawilohna an lantir chu an tina zual zel tawh dawn an ti bawk.
SKM (non-political) protest ah telve lo mahse SKM leader te chuan police tena loneitute kut an thlak chu an duhloh thu an sawi bawk a. “Minister ten MSP an rawtn chu A2+FL + 50% or C2+50% behchhanin a ni em tih pawh an sawi chiang thei lo. Inbiakna tum li lai neih a ni tawh chungin sawihonaah langtlang a awm lo va. Hei hi kum2020-21 a SKM huaihawta loneitute harsatna kalpuia democratic culture kalpui kalh tlat a ni” tiin an sawi bawk.
“Political party nen inzawmna kan nei lo. Uttar Pradesh, Punjab leh Chhattisgarh leh State dang dangah lungawilohna kan lantir tawh. Kan lungawilohna hi sorkar leh a policy vang a ni” tiin senior SKM leader Rakesh Tikait chuan a sawi bawk.
Centre leh farmer aiawh tena meeting tum li an neihna chu Pathianni kalta zan khan Chandigarh ah neih niin meeting zawh hnuah Union Commerce Minister Piyush Goyal chuan meeting chu a hlawhtlin thu a sawi a. “Farmers’ demand te sawihona kan neia road map kan siam a ni. Loneitu aiawh ten topic thenkhat an sawi alng a, issue pathum pali tihloh chu lungrual tlanna neiin adang te chu Haryana, Punjab leh ram chhung hmun tina loneitute ngaihtuaha la ngaihtuah chhunzawm tura dah a ni” tiin a sawi a.
“Rawtna sawihona neih niin chutah chuan sorkar agency NCCF leh NAFED te ang ten contract siamin pulses-arhar, tur leh urad te corn te MSP a lei theih tura ruahman a ni a. A tam lamah bithliah a awm lovang. Chutiang bawk chuan Cotton Corporation of India pawhin MSP a cotton kum nga chhung lei nan inremna a siampoui ang a. Punjab ah cotton te tharthawh leh ni se kan duh a ni. Loneitute pawhin kan rawtna siam te chu an enho hnuah an ngaihdan min hriattir leh dawn a ni. Chumi hnuah chuan inbiakna kan chhunzawm zui thei ang” tiin Piyush Goyal chuan a sawi bawk.
“Policy thil kaihhnawih tuna chinfel mai theih loh leh hun duha inrawntlanna nasa zawk ngai thil te a awm a. Inthlanpui a hnai sia sawihona neih chhunzawm a ni ang” tiin Commerce minister Goyal chuan a sawi bawk.
Pathianni zana meeting-ah khan Union Ministers Arjun Munda, Piyush Goyal leh Nityanand Rai bakah farmer leaders Jagjit Singh Dallewal leh Sarwan Singh Pandher te bakah Punjab Chief Minister Bhagwant Mann te pawh an tel a ni.
Hetihlai hian Punjab loneitute chu Haryana nena inrina bulah camp siamin an la inkulh reng bawk a.
Punjab loneitute hi Shambhu-Ambala leh Khanauri-Jind ah te inkulhin Haryana luh an tum chu danin an awm a ni.