Loneitute “Inelna”

Tun hnaia horticulture minister leh district hrang hranga horticulture department officer-ten an hnathawh thlirletna hun an hmanaah minister chuan, district hrang hranga loneitute tan inelna siam a rawt a. Minister hian sawrkar policy tihlawhtling turin horticulture department chu a pawimawh berte zing ami a nih thu sawiin, department dangte nena convergence-a tangtlanga hmalak a tha, a ti a. Inelna chu small farmer-te dinhmun chawikanna atana pawimawh a nih thu a sawi bawk.
Inelna neih hian thatna tam tak a nei; inelna boruak hian mi a ti thatho a, a sawtin a hlawk bawk.
Loneitute pawh hi inelna huaihawtsak an nih chuan inelna rilru tel lova hnathawh ai chuan inelna rilru nena hnathawh chu a sawtin a hlawk ngei ang tih a rinawm. Inelna tel lo pawhin loneitute hi chuan a hlawk thei ang bera tharchhuah theih hi chu an tum lian ber a ni lo thei lova, mahse chu chu an dinhmun azirin a then tharchhuak tam thei, tharchhuak tha thei an nih laiin, thenkhat dinhmun hniam deuh chuan dinhmun tha zawkte thar zata tam leh tharchhuah quality ang an pha kher lo thei. Chuvangin inelna huaihawt a nih dawn chuan category tam taka thensawm a ngai dawn tih a lang a, thil hautak tham ve tak chu a ni ang tih a rinawm.
Inelna huaihawt a nih dawn chuan, sawrkar hian loneitute hi an trade azirin an hnathawhna tur atana pawimawh hmanrua/bungrua/thlaichi etc. te engemaw chen chu rualkhai taka a tumsak (facilitate) a pawimawh dawn a. Inelna huaihawt a ni lo chung pawha loneitute facilitate hi chu sawrkar mawhphurhna a nih sa ve tawh hrim hrim avangin, horticulture department hian convergence hmanga thurualpui theih tur a kaihhnawih department a nei nualin a rinawm.
Hetianga tanhona leh thawhhona hnuaia inelna huaihawt theih a nih phawt chuan, a hnu zel atan pawh, inelna boruak tel lo pawha thahnemngai taka mahni tana chakai khawrh kawngah thahnemngaihna rilru thar kan put theih phah ang a, chu chuan state economy chawikan kawngah nasa takin awmzia a nei pha ngeiin a rinawm.
State sawrkar pawh hian, a nihna takah chuan, state dangte hi a elpuite an ni tih hre thar nawn leh fo se, loneitute dinhmun chawikan hi state economy chawikanna a ni tih hi hrechiang nawn leh se a duhawm hle a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More