Loneitute kawngzawh dan tum

Loneitu ten Thawhlehni a Delhi pana kawngzawh an tum chu dan chah tumin Haryana a BJP sorkar chuan district pasarihah mobile internet connectivity a titawp a. Manohar Lal Khattar sorkar chuan dongle service leh mobile phone service te titawpin voice call erawh tihtawp a ni lo an ti.
Loneitute hian Minimum Support Price (MSP) guarantee te, pension leh insurance scheme te an ngiat a, Delhi pana kawngzawhnaah hian pawl 200 chuangin tel an tum a ni.
Police te chuan Haryana-Punjab border te chu khar tum bawkin Punjab atanga loneitu tena Haryana an luh an remti dawn lo a ni. Punjab loneitute chuan Delhi an pan dawnin Harayana an luh phawt a ngai a ni.
Harayna leh Delhi ramriah pawh cement barrier, barbed wire leh sandbag te chhawpin loneitu rual tena nationla capital an luh chu danchah bur tum a ni a, water cannon leh drones te pawh chhawpchhuah a ni bawk.
Haryana Police te pui turin paramilitary forces company sawm nga tirhluh a ni tawh bawk a ni. Haryana police chief Shatrujeet Kapur chuan boruak muanawm tihchhiat tum a nih chuan nataka an chhanlet tur thu sawiin a vau nghal a. Police te chuan loneitute chu public property tichhe hauh lo turin an vau bawk a. Haryana Home Minister Anil Vij pawhin state sorkar chuan remna leh muanna a awm ngei theih nan hma a la dawn a ti bawk.
Hetihlai hian Sorkar laipui chuan Thawhtan hian loneitute chu inbiakna neihpuiah a sawm a. Mahse, chu chuan loneitut tena lungawilohna an lantir tum chu a tihtlawlh a beiseiawm loh thung.
Lungawilohna hi Samyukt Kisan Morcha (non-political) te huaihawt a ni a, farmer’s organisation thahnem tak te chuan an thlawp lo thung. Bharatiya Kisan Union (Lakhowal) kum 2020-21 a lungawilohna an lantira Centre in farm law pathum a hnuhdawhphahna te chuan an telloh tur thu sawiin mahse Zirtawp-ah lungawilohna an lantir ve thung tur thu an sawi thung a. BKU te chuan Thawhlehni a lungawilohna lantirah kutthlak an nih chuan Union tin ten kawtthler tinah lungawilohna kan lantir ang an ti bawk.
Delhi police te chuan loneitu tena an nekluih palhah teargas shell practice te an nei lawk a. Chuvang chuan a chhehvela cheng te chuan sawisel thungin police te teargas kahchhuah enchhinna vel chuan harsatna a siamsak an ti ve thung.
Intelligence te chuan loneitu 20,000 chuang velin an tractor 2,000 bawr vel nen Delhi khawpui luh an tum dawn niin an sawi a ni.
Delhi Police te an inpuahchah nasa hle a, kum 2021 a thil thleng ang kha a thlen nawn an remti dawn lo. January 26, 2021 khan loneitute chuan Delhi lutin tharumthawhna a chuak zui a ni.