Mizoram University Department Horticulture Aromatic and Medicinal Plants (HAMP) in Department of Biotechnology (DBT) atanga Biotech- Krishi Innovation Science Application Network (Biotech-KISAN) project a hmuh hmanga loneitute eizawnna leh an sum lakluh tih hmasawnna turin district hrang hranga Krishi Vigyan Kendra (KVK) kaltlangin kalpui mek a ni.
-- Advertisement --
Project fund petu DBT hi sawrkar laipui Ministry of Science and Technology hnuaiah kum 1986-a a din a ni a. Ram chhunga biotechnology lam thiamna tihhmasawn leh inrelbawlna tha siam te, thlawhhma lak kawnga senso tlem si hlawk leh tha zawk tharchhuah leh hralhchhuah bakah khawtlang sum leh pai dinhmun tih hmasawn hna a thawk thin.
DBT Biotech-KISAN Project hnuaiah hian loneitu leh mithiam (scientist) te thawkhoin, loneitute ban phaka science thiamna chhawpchhuah sak a, science laboratory leh thlawhhma thlunzawm chu a tum a ni a. Scientist-ten loneitute harsatna tawh thin hrang hrang zirchiangin, an zawnchhuah pui anga, chu’ng harsatna chinfel pui leh tunlai thiamna hmanga thlawhhma lak dan changkang leh hlawk zawk inzirtir bakah huan lo ram nei zau lo, a bikin hmeichhe kuthnathawktute chawikana thawhhona thazawk siam te a tum a ni.
Chutianga hma la tur chuan MZU-a HAMP department chu ‘Hmunpui’ (Hub) atan thlan a ni a. Project coordinator atan Prof. Rambir Singh ruat a ni. He project kaltlang hian thlai leh hmuihmer (spice) thlanchhuah bikte chu hlawk zawka thar a nih theihna’n loneitute chin tir an ni anga, MZU HAMP department chu zirchianna hmun niin, thlai tharchhuah, a that dan duhthusama vawn leh sawngbawl, lei leh hralh dan kawng awlsam zawkte a ngaihtuah bawk dawn a ni.
HAMP department-a khawl leh bungrua hi KVK scientist-te leh loneitute hman theiha chhawp a ni a, scientist-te pawh tunlai thiamna sang leh khawl changkang hmanga training pek thin an ni. District tina KVK-ten anmahni huamchhungah loneitute ziaklutin, project chungchang leh hmalak dan an hrilhhre thin anga, loneitute hnenah thlai chi tha leh tiak semin KVK subject matter specialist leh MZU mithiamten loneitute hnenah thlai chin dan leh enkawl dan, an tharchhuah hlutna belhchhah dan an zirtir thin dawn a ni.
Heng thlai bakah hian hmuihmer chi hrang hrang – sawhthing, Mizo hmarcha leh aieng quality tha tak tharchhuah theihna’n leh a hlutna belhchhah thei turin he project hnuaiah hian loneitute chintira hma lak a ni bawk a. Mizo hmarcha leh sawhthing (thingpui leh thinglaidum) bik phei chuan Mizoram Geographical Indication Tag (GI Tag) a nei tawh tih sawi a ni.