Loneituten duh khawp leichi hmu lo

Loneituten duh khawp leichi hmu lo
Tunhnaia Champhai district-a khaw 40 chuang zirchiannaah lei hanna da zel leh leichi (urea) duh khawp hmuh loh avangin loneitute tharchhuah a hlawk lo tial tial nia sawi a ni.
Champhai district-a leichi lakluhte dan anga hralhchhuah a ni em tih leh, dan loa tawlhruk a awm em tih endik tura sawrkarin a din, Champhai District Vigilance Committee on Fertilizer chu Nilaini khan an chairman, bawrhsap James Lalrinchhana hoin an thukhawm.
Loneituten an tana lo thleng a ni tih an hriat a, hemi kawnga inzirtirna pek dan tur sawi ho a ni a. Leichi lo thlen hunah a thleng zat leh allotment neih dan loneitute hrilhhriat zel dan ngaihtuah a ni. Khawtin tana mamawh angte siamrem nise, a hmang tangkai tur takte chauhin an hmang ngei a ni tih finfiahna’n leh a putru thin venna’n hma lak nise tih a ni a; a nih dan tur ang takin hman a ni em tih enfiahpuia tawiawm turin YMA phungbawma sawm nise an ti. Champhai leh a chhehvel bakah thingtlang lam thlenga mamawh phuhruk a nih theihna’n dealer-te chanpual siamfel a ni.
DAO Champhaiin tunhnaia a zirchiannaah Champhai bakah khaw 43 ah agriculture sector, thingtlang leh phai lo nei an awm a; horticulture sector hnuaia huan nghet nei an awm nual bawk. Kumtina lei hanna da zel leh duhkhawp leichi hmuh tur a awm loh avangin buh leh thlai chin a hlawk lo zel a, eizawnna danga insawn an awm chho mek zel. Champhai leilet hectare 593.36 a zau pawh leichi duhkhawp hmuh loh chuan buh leh bal hlawk takin a thar theih tawh meuh lo tih sawi a ni.
Kumin Kharif season – April thla bik atan Mizoram chuan sawrkar laipui atangin Brahmaputra Valley Fertilizer Corporation Ltd (BVFCL) company kaltlangin quota, urea quintal 20000 subsidised rate-in a dawng a. Heng zinga quintal 2833.2/ bag 6296 (bag khat kg.45 ang zela chhut) hi Champhai district tana ruahman a ni. BVFCL company kaltlanga an district tana leichi supply tura pawmpui approved dealer 4 te chu chanpual quintal 708.3 (bag 1574) theuh pek an ni.
Approved dealer nilo, state dang leh district dang qouta leichi tawlhte chu man zel tura tih niin, district qouta pawh hmundanga tawlhruk a nih loh na’n thlithlai nise an ti.