MSSSB hnuaia hna lak tum cancel leh tihdanglam awm

MSSSB hnuaia hna lak tum
cancel leh tihdanglam awm
Mizoram Subordinate Services Selection Board hnuaia surveyor post 15 lak tum chu cancel leh a ni a, circle officer post 36 lak tur chu co-terminus basis a ni tih chhuah that leh a ni bawk. Board chairman chuan hna dil tum application form thehlut tawh zingah lalet leh duh an awm a nih chuan an insenna pekkir an inhuam tih a sawi.
Common Recruitment Examination kalpui tur, Land Revenue & Settlement department-a surveyor post 15 lak tur cancel a ni leh, Social Welfare & Tribal Affairs department hnuaia circle officer post 36 lak tur co-terminus basis a nih tur thu an chhuah that leh chungchangah hian Mizo Students’ Union chuan MSSSB chairman C Lalhuliana an hmu a. Surveyor lak tur hi department atanga technical paper an buatsaih loh avanga cancel leh a ni tih lo hrilhin, department atanga technical paper buatsaih a nih huna surveyor post 15 lak tum hi tih that leh a nih tur thu a sawi.
Circle officer lak tur co-terminus tih leh si chu MSSSB chairman chuan, department atangin co-terminus basis a nih tur thu hriattir an nih rualin, eng huna tawp tur nge tih an dawng tel loa, advertisement-a co-terminus basis a nih tur thu an ziahlan loh vanga an tihsual an pawm thu a sawi a ni.
MSSSB chairman chuan tun Common Recruitment Examination tura surveyor leh circle officer hna chauh dil tum emaw Common Recruitment Examination zinga hna dang dil duh an awm a nih chuan, application form thehluhna man an sen chu pekkir leh an inhuam tih a sawi a ni.
MSU Gen. Hqrs chuan MSSSB hnuaia Common Recruitment Examniation tura tihsual leh tih danglam a awm chu tha lo a tih thu sawiin, zirlai hna dil turte rilru sukthlek tibuai zawnga department leh MSSSB an fimkhur tawk lo leh an chefel tawk lo chu tun hnu zela thleng nawn tawh lo turin an ngen tih a sawi.