Louvre Museum rawk, ‘a man chhut chhuah rual lohva hlu’ ru

Louvre Museum rawk, ‘a man chhut chhuah rual lohva hlu’ ru
Paris-a thil hlui vawn thatna hmun lar tak, Louvre Museum chu khaw ên laia France-a hlu tak crown ruk tum ni ngeia hriatten an rawk hnuah khar a ni a, police-in an chhui mek.
Rukrute hian wielding power tool hmangin khawvela museum tlawh tam ber hi an rawk a, scooter hmangin ‘a man chhut chhuah rual loh khawpa hlu’ nen an tlanchhe zui.
Inrawkna hi Pathianni chawhma dar 09:30 leh 09:40 inkar, museum hawn hnu lawka thleng a ni.
Rukrute hian River Seine hnaih taka balcony atangin khawl leilawn hmangin Galerie d’Apollon (Gallery of Apollo)-ah hian an lut a. Thlalak darhah pawh leilawn invuahna lirthei, chhawng khatnaa indawh pawh hmuh theih a ni.
An lawn hnuah hian glass pane chu angle grinder nge thil zaina zawk hmanga zai kuain an lut a ni.
Culture Minister Rachida Dati chuan French chanchinbu, TF1 hnenah a lan danah hmai tuama mi rawktute hian ‘hahdam takin’ an lut a, tlereuh chi hrang hrang awmna case an la chhuak tih a sawi.
Tumah inhliam pawh an awm lo va, tharum thawhna a thleng lo va, ‘professional takin an che’ niin Dati-i chuan a sawi.
Ruahmanna fel tak neiin ‘tawnhriat’ pawh tam tak an nei tawh a ang a, scooter-a tlanchhiatna tur pawh an ruahman thlap tih a sawi.
Chhutute chuan mi pathum emaw, pali emaw an inrawlh an ring a, CCTV footage an en mek.
Interior Minister Laurent Nuñez chuan France Inter radio hnenah ‘rang takin’ thil a thleng tih a sawi a, minute an mamawh tlem hle niin a sawi.
French thuneitute chuan eng nge ruk tih an sawi lo va; mahse, an luhna hi France ram lalte tlereuh leh thil dang hlu tak tak awmna pindan peng a ni.
Dati-i chuan thil pakhat chu museum pawnah an hmu a, an tlanchhiatnaah an thlauh a nih an ring tih a sawi a. Le Parisien chanchinbu chuan thil chhar hi Napoleon III nupui, Empress Eugénie lallukhum niin a tar lang.
Le Parisien hian carat 140 rangkachak awmna, gallery-a mi hiptu ber, Regent Diamond chu ruk niin a tar lang bawk.
BFM chuan thil ruk zingah Napoleon III kaihhnawih tlereuh te a tel niin a tar lang a. Cabinet dang, lal thil hlu tak tak awmna pawh khawh niin a tar lang.
Nuñez-a chuan tlereuh ruk chhuahte chu ‘a man hu awm lo’ leh ‘teh theih rual lohva thil hlu’ niin a sawi.
Kum 1911 khan Italian museum-a thawk pakhat chuan hetih hun laia la lar lutuk lo, Mona Lisa chu a coat hnuaia dahin a ru chhuak a. Kum hnih hnuah hmuh chhuah a ni a, a titu hi Leonardo da Vinci-a thil ziahte chu Italy ram ta nia ngaih vanga hetianga ti hi nia insawi a ni.
Tunah chuan Mona Lisa leh museum-a thil hlu dangte pawh ruk a har tawh a, khai niin high-security glass compartment-a dah vek an ni.
Kum 1998 khan kum zabi 19-naa Camille Corot lemziah, Le Chemin de Sevres chu ruk niin tun thlengin hmuh a la ni lo va, hei hi museum venhimna tihkhauh zualna pakhat a ni.
French museum-te hi rawk tum zeuh zeuh a ni hlawm a. Thla hmasa khan Limoges-a Adrien Dubouche Museum chu rawk niin porcelain work $ maktaduai 11 man hu ruk a ni.
November, 2024 khan Paris-a Cognacq-Jay Museum atangin thil hlu tak tak pasarih ruk a ni a; mahse, ni rei lo te hnuah hmuh a ni.