Central YMA Kumpuan Sub Committee chuan Ferbuary 3 zing khan Khamrangah LPG tihchingpen bur 318 an man a, LPG phurtu truck khalhtu hi hnam dang mi niin a truck chawp hian Legal Metrology hotute kutah an hlan a.
-- Advertisement --
CYMA Kumpuan hian January 6 khan Khamrang chhehvelah gas tihchingpen bur 342 an lo man tawh bawk.
Gas bur tihchingpen hi Mizoramah kan hmelhriatna a rei tawhin kum sawm kalta hma lam atang daih tawhin tihtawp tuma hmalakna beihpui thlak a lo ni tawh thin a, tun thlengin a la reh thei lo. Hetiang thil a thlen reng theihna ‘chhan’ hi kawng hnih a awm thei a, chu chu Agent (Distributor) te leh mipuite an ni, a tih theih ang.
Pakhatnaah chuan, kawng laka LPG phurtuten gas an tihchingpente hi Agent lamin an lo dawnsawn laiin emaw, mipui hnena an sem chhuah hmain emaw a buk a tlin leh tlin loh an finfiah hmasa tur a ni a. Agent-te hian hei hi an lo enfiah (check) ngun loh thin chuan thil sual tihna hun remchang melh rantu LPG phurtute tan chuan ‘chance’ tha tak a ni thei dawn tihna a ni.
Pahnihnaah chuan, Gas tihchingpen a ni a, Agent lamin enfiah mumal lovin mipui hnenah lo sem chhuak ta pawh ni se, mipui lam hian gas buk a tlin leh tlin loh an lo enfiah peih leh si loh chuan, Gas tichingpen thin tan chuan kawng a kaw ta ruak mai tihna a ni thei bawk.
He endik system hi tha taka kan kalpui loh avangin Legal Metrology leh YMA lamin an hah phah ta em em a, an man chhuah sen loh tam takin mipui a thleng a, mipuiin engmah hre lovin kan lo tuar ve leh a, chutiang vel chu kan ni thei awm e.
Dik taka mipuiin gas an hmuh theih nan thuneitu lam chuan Marketing Discipline Guidelines, 2018 for LPG Distributorship behchhanin vawi tam tak mipui hnenah hriattirna an chhuah tawh a. He Guideliness-ah hian, “Distributor ten a semna tur Point ruata Gas an sem dawn reng rengin, Bukna (digital weighing scale) an kengin an hmang ngei tur a ni” tih a awm a. Distributor ten bukna an ken loh pawha mipui lamin kan en liam mai mai thin avangin, Agent lam pawhin transporter atanga gas an lo dawnsawn kawngah an inthlahdah phah emaw, an lo thurualpui duh hial emaw pawh a ni thei a, Dan zawm loh avangin thil dik lo thlen theihna kawng zau tak a inhawng thei ta tihna a nih chu.
Mipui lam hian danin ti tura min hrilh ang hian fet (strict) peih ila chuan, heng thil hi a thleng reng bik kher awm lo asin!