Sabalenka dang zo la awm lo

French Open hmeichhe singles khelh mekah Ningani khan Serena Williams (2015) dawta women’s player zinga kum khat chhunga Australian Open leh French Open la ve ve thei hmasaber nih tum mek Aryna Sabalenka chuan minute 62 lek chhunga Japanese Moyuka Uchijima sawpin round of 64 a paltlang.
World number two hian Court Philippe Chatrier-ah 6-2 6-2-in Uchijima a hneh a; third round lamah Roland Garros quarter-finalist lo ni tawh Paula Badosa a tum leh ang a, an tlang chho dun zel a nih chuan Kazakh fourth seed Elena Rybakina nen semi-final match pakhat zawkah an insu thei dawn.
British number one Katie Boulter-a tournament tihtawpsaktu Spaniard Badosa hian second round inkhel dangah set hmasaber hloh zet chungin Kazakhstan nula Yulia Putintseva lakah 4-6 6-1 7-5 hnehna a chang.
Nikum Roland Garros-a last four thleng Belarusian Sabalenka hian grand slam tournament a khelh hnuhnung vawirukah semi-final chin a la chuangkai zat zat a; kumin hi Australian Open title humhim chungin kum bul a tan a; French Open inbuatsaihna Madrid Open leh Italian Open-ah pawh final lut ve vein world number one Iga Swiatek a ngam lo ve ve a, Paris tournament-ah pawh hian kum 26 mi tana huatthlalaawm leh ber tura ngaih chu Pole bawk hi a nih leh hmel!
Ningani inkhel dangah 2022 Wimbledon champion Rybakina chuan bul tan fuh vak lo chungin Arantxa Rus of the Netherlands lakah 6-3 6-4 hnehna a chang a, third round a luhna mual hi Court Suzanne Lenglen a ni.
Hetih lai hian Danielle Collins-i French Open game hnuhnungber ni ve tawh tur chu tlawm chunga khar a ni a, world number 125 Olga Danilovic of Serbia lakah season kal lai tawp ruala tennis inelna chawlhsan ve tawh tum American 11th seed hi 6-7 (3-7) 7-5 6-4-in a tlawm.
Beisei loh result dangah he hmuna kum 2017 champion Latvian ninth seed Jelena Ostapenko pawh 7-6 (4) 4-6 6-3-in 72nd seed Clara Tauson of Denmark chuan a hneh ringawt!
Kum hnih kaltaa semi-final lo lut ve zak zak tawh Russian 10th seed Daria Kasatkina pawh American Peyton Stearns chuan 7-5 6-2-in a hnawtchhuak ve bawk.
Ukrainian 15th seed Elina Svitolina erawh French home hope Diane Parry laka 6-4 7-6 (7-3) hnehna nen a tlang a; 14th seed Madison Keys pawhin 6-0 7-6 (9-7)-in Egypt star Mayar Sherif a hneh ve bawk.
Reigning Wimbledon champion Marketa Vondrousova chuan ruahin a bumro hnuaiah chiang zeta set khatna hloh zet chungin American Katie Volynets lakah 0-6 6-1 6-4 hnehna a changlet ve bawk.
2019 US Open winner Canadian Bianca Andreescu pawh set khatna bawk hloh hnua insiamthain Russian 23rd seed Anna Kalinskaya lakah 1-6 7-5 6-3-in a chk a; hetih lai hian 2019 semi-finalist American Amanda Anisimova erawh 6-2 6-1-in Russian 17th seed Liudmila Samsonova chuan a hnawtbo ve thung.