Lui hrai

Tun hnaia Phulpui leh Baktawng ram inkara Tuirial lui hrai chungchangah khan lui humhalhtu Save Mizoram Rivers chuan a titu chhui chhuak a, hremna pek an nih theihnan police-ah FIR thehluh an tum thu an sawi a. Lui hraina hmun hi a hnuah Aibawk Range Officer ten an enfiah bawk a.

Tunhma deuh kha chuan lui hrai thawm hi hriat tur a awm fo a, tun hnu deuh, environment pawimawhna kan inhrilh a, kan inzirtir nasat tak hnu erawh hi chuan, lui hrai thawm te pawh hi hriat tur a awm ta meuh lo a, Mizote pawh environment humhalh kawngah kan thangharh chho tan tawh niin a lang. Chutih mek laia ‘lui hrai’ tih thawm hriat tur a han awm thar leh ta hi a pawi takzet.

Environment humhalhtu pawl pakhat Youth for Environment Justice Mizoram chuan kan hnung lawkah khan kawng laitu company lian pakhat, NHIDCL-in lung lak nana lui an suasam chungchangah thuneitute hnenah zualkovin, thuneitute chuan kawng siamtu company hi an thiltih bansan turin thupek a lo chhuah tawh bawk a. Kha thil thleng pawh kha luia nungchate suasamna a nih avangin thuneitute chuan an ngai serious em em a nih kha. Tuna Lui Hrai phei hi chu a ‘serious’ lehzual awm e.

Kan environment te, kan forest te, climate change te buaipui tur bik hi India sawrkar chuan “Ministry of Environment, Forest and Climate Change” a din a, Mizoram sawrkar hnuaiah pawh he department hi a awm a. EF&CC department hian mawhphurhna a nei zau hle mai a, environment tih hian lui te, tlang leh ruam, ramngaw a huam vek mai a. An mawhphurhna hi a sâng a, an duty-na pawhin a huam zau bawk.

Ramhnuaia duty-a chhuakvak thin Forest Guard kan tih te kha tun hnuah hian ramhnuaiah hian hmuh tur an tam ta lo nge, environment suasam lai man chhuaktu tur an ni a, suasamna hmun endik tur chauh ni lovin.

State dang thenkhatah chuan Forest Guard-te hi ralthuam nen an thuam tha hle a, ramhnuaiah misual deuh an tawn palh pawha beihletna tur silai an nei thin. Mizoramah pawh hian environment vengtu Forest Guard-te hi tuaithar leh deuh an ngai niin a lang. Ramhnuaiah an hmel hmuh tur hi tam se, silai te pawh pu ve mai se, kan environment-in suasam a tawk fo hi a vengtu lam kan inthlahdul ta deuh a ni mai lo maw?