High Powered Committee (HPC) Lunglei bultumin Vanva Group YMA huamchhunga luidung humhalh nei YMA branch hrang hrangte, sangha dil neia eizawngte leh zirlaite chu Thawhlehni khan Haulawngah kokhawmin an hriat tur tul hrilh an ni.
-- Advertisement --
Fisheries department hotute chuan mi pamham leh chimawmte avangin luidung an chereu nasa tih an sawi a. Nungchate nen hian inmamawh tawn kan ni, tiin, Mizoram Fisheries Act 2022 chuan kan luidung nungchate an damchhung hunah vawihnih khat tal an inthlahpun theihna’na humhalh hi a tum pui ber a ni tih te an sawi.
He Act hi Mizoram pum huam a nih avangin luidung zawng zawng chu sawrkar ta a nih thu te kumtin sangha man theih loh bur hun (closed season) siam thin a nih thu leh, dan hnuaiah len den, nghakuai khai, ngawidawh, hawlhrawk hawlhah te department hnuaiah lisence dilin sangha man theih a nih thu te an sawi a. Dan zawmloa tiluite hremna dan hrang hrang hrilhhriat an ni.
Vanva Group YMA hruaitute report danin, kum 2012 atangin Vanva lui humhalh a ni a, a tirah Vanva lei atanga lui hnar lei, lui mawng lam km.1 huamchhung humhalh phawt a ni a, kum 2020 atangin Vanva Group huamchhung Vanva luidung chu humhalh a ni. Fisheries department atangin a thlawn leh man tlawm zawkin sangha chaw hmuh thin a nih thu sawi a ni a. Department ngenna angin nghahrah (Mahseer) breed tur man a ni tawh a ni.