Lui tui nut chhan chhui phalna court-ah dil tum

Mizorama lui tui nu in mihring leh nungchate a tihbuai mek avangin, tui nut chhan chhui chiang a, a tinutu dan anga hrem an nih theihna’n court-ah chhui phalsak turin environmental activist Vanramchhuangi chuan dilna thlen a tum.
Mizorama lui tui nu in mihring leh nungchate a tihbuai mek avangin, tui nut chhan chhui chiang a, a tinutu dan anga hrem an nih theihna’n court-ah chhui phalsak turin environmental activist Vanramchhuangi chuan dilna thlen a tum.
Centre for Environment and Social Justice-a hruaitu ni bawk Vanramchhuangi (Ruatfela Nu) chuan, Mizorama lui hrang hrang, mihring leh thlai, ran leh ramsa, lui nungchate tana ei leh chenna tlak loh khawpa a nut chhan chu National Highways & Infrastructure Development Corporation Limited (NHIDCL) kawng laiin dan loa an kawng laihna vung kawngthlanga an nawr liam vang a ni tih a sawi a.
Aizawl khawpui chawmtu Tlawng lui nut chhan pawh state sawrkar hmalaknaa link road laihna leivung dan loa paih vangte, hmasawnna hna hrang hrang thawhna leivung leh bawlhhlawh paih vangte, in sakna hnawmhnawk bakah mimal leh dawrkai bawlhhlawh a ruka luikawr leh Tlawng lui fintu luitea paih vangte a ni, tiin, chutianga dan loa leivung leh bawlhhlawh paih chu ruah a surin Tlawng luiah a lutkhawm vek tih a sawi.
“Aizawl khawpui chawmtu Tlawng lui nut vang hian tui a pump theih loh a, furpuiah lui tui a tam em em laiin tui tamin kan tam mek a ni,” a ti.
Mizoram lui hi fur ruahsur vangin in tlak loh khawpin a nu ngai lo a, a finfiahna video clip, hmun hrang hrang ami an nei tih Vanramchhuangi hian a sawi a. Kumin June 16-a lui thenkhat nut zawng an tehna atang pawhin NHIDCL kawng laihin a khawih phak loh lui te a nu nasa ve lo tih chiang takin a lang tih a sawi a ni.
NHIDCL kawng laihna hmun zaa 99.9 ah luikawr leh luite (seasonal leh perennial river) te an kawng laih vungin a chhilh vek nia sawiin, “Ruahsurah an kawng laih vung chirha chang ta chu kan lui lian (major river) zawng zawngah a luang lut a, kan lui lian chu leivung leh bawlhhlawh (siltation) a a khah vangin lui tuite hman tlak lohin a bawlhhlawh phah ta a ni,” a ti. Tuivawl luiin a chawm, Saitual leh a chhehvel khua chuan May 19 atang khan Tuivawl nut vanga tui pump thei loin tui supply an hmu tawh loa, tui an lei ngat ngat tih a sawi.
“Kan lui tui hi mihring tih bawlhhlawh ngei a nih avangin a ti bawlhhlawhtute chu tute nge an nih, tih chhuichhuah a, dan anga an chunga action lak a nih theihna’n chief judicial magistrate hnenah chhui phalna ka dil dawn a. Kan lui tui nu vanga tuartute tawrhna a nasat em avang leh a tuartu mipui kan tam lutuk vangin min phalsak ngei ka beisei,” a ti.