Compensation lak chhuinaah thil mak hmuh belh zel

Vairengte leh Aizawl inkar kawngpui, four lane-a laih tura ram laksak turte hnena compensation pek danah thil mak tak tak an hmuh belh zel tih Kolasib MJA chuan an sawi.
A thawhhnihna atan MJA Kolasib District chuan Vairengte leh Aizawl inkar kawngpui, NHIDCL-in an laih zauh tura zangnadawmna (compensation) sem tawh chungchang, RTI hmanga an zawhna chhanna an dawn behchhana thil awm dan an chhuizuinaah June 17 khan Vairengte leh Chhimluang khua an tlawh a. Khawtlang hruaitute kawmin an zawhna chhanna a\angin National Highway 4-lane compensation sem chhuah tawhah hian thil mak tak tak a awm nia a lan thu an sawi.
An thilmak tawn zingah, Vairengtea ram pakhat chu NHIDCL hotute nen re-survey neih a nih dawn \umin, surveyor-te ruahmannain ‘khuai bu a awm’, tiin, NHIDCL mite an kal ngam lohna’n thil tih a ni a. Helai ram hi NHIDCL hian a hmunah endik se cheng nuai tam tak an paih \hen sak ngei rin a nih thu sawi a ni.
Mi pakhat chuan MJA-te hnenah hian, surveyor pakhat hnenah compensation a dawn beiseiin cheng sing hnih a pek thu leh, a ram chu 4 lane-in a paltlang leh tak loh thu a sawi a. Surveyor hian a sum hi a pe let rih lo a, nakinah, kawng laih hunah a sum sen hi a thlawn dawn lo tiin a hnem, tih sawi a ni.
Mizorama mi lar tak pakhat hmingin compensation nuai 33 chuang pek chhuah a ni a. He ram hi zirchian a nih hnuah thlai awm lo, kawngpuiin zimte a paltlang tur, ram enkawltu pawhin compensation tam tham dawnna tura a ngaih loh avanga survey lai pawha a hmuna a kal duh lohna a nih thu hriat a ni tih an sawi.VCP pakhat chuan ama hming, a nupui hming leh a fanu hmingin compensation a la a. Anmahni ramah compensation a lak bakah mi ramah ama hminga pass insiam ve in, hmun engemawzatah compensation a la nia thu dawn a ni.
Mi pakhat ram chu pass parukah then a ni a. Hetah hian compensation buaipuitu official zing ami chhungte pahnih hmingin pass siam tel a ni a, heng mi pahnih hian compensation hi nuai 73 chuang an la tih sawi a ni.
4-lane kawngpuiin a paltlang loh tur nia sawi ram pakhatah chuan compensation pek a ni a. He ram atang hian compensation buaipuitu official chhungte zing ami hnenah cheng nuai 30 chuang pek a ni.
Ram pakhat chu officer pension tawh fanuin cheng nuai 7-in a leisak a. A neitute hian an ram leh an thlai neih enin compensation hi tihtham an dawn an inbeisei loa, compensation erawh cheng nuai 16 dawn pek a ni tih an sawi.
‘4 lane compensation sem chhuah tawh hnua hetianga hma kan lak chhan hi mi tute emaw tih hmingchhiat tumna leh mimal huat kan neih vang emaw a ni lo a. He compensation sem chhuahah hian uchuak taka sum siamna a awm ngei nia sawi a nih vang te, official leh khawtlang hruaitute zingah pawh thil diklo tih hreh lo an awm nia sawi awmte avanga hma la kan ni a. Thil dik tawk lo engemawzat a awm tih a chiang hle,’ MJA Kolasib District chuan an ti.