Luia stonedust leh leivung paihluh CESJ-in thenfai tir

Luia stonedust leh leivung
paihluh CESJ-in thenfai tir
National Higway 54 kawng laih zauh hna thawktu NHIDCL hnuaia contractor-in Tuirial luia stonedust leh leivung an paih chu Centre for Environment and Social Justice chuan a enfiah a. An thianfai lo a nih chuan thuneitute hnena thlen an tum thu an sawi.
Centre for Environment and Social Justice (CESJ) thuchhuak chuan, kawngpui pawimawh, Mizoram district 5 paltlang, km. 381-a thui, Assam nena inthlunzawmna NH-54 laih zauh hna thawh mekah Tuirial khaw huamchhunga NHIDCL hnuaia contractor, Shivalaya Co. Ltd-in Tuirial luia stonedust leh leivung an paihluh chu January 29 khan enfiahin, company hian kar hnih chhunga thianfai a, a dalna siam tura an intiam chu an ngaichang a. A tul chuan thuneitute hnena thlen nise tiin thu an lo dah tawh a ni.
Hemi chungchang hi an bawhzui zel a. Tuirial luia stone dust leh leivung an paih luh hi Shivalaya Co. Ltd hian an thenfai bakah a dalna tha takin an siam tih an hriatin CESJ chuan lawmawm a ti hle tih a sawi.
2024 December 21 khan CESJ chuan Bungher area-a Shivalay Pvt. Ltd-in rora a herna nawi (stone dust) chu Tuirial lui fintu Beraw luiah a lut tih hria in, an enfiah tawh bawk a. Shivalaya manager hnenah luia lut tur danna lung fun (gabion wall) siam turin an ngen a, hei pawh hi an ngen angin an lo siam tih a sawi a ni.
Mizoram hmun hrang hranga dan loa hmasawnna hnathawhin thing leh mau an tichereu a, a hmuna cheng nungcha an tichimit a, kan luia leivung an paih pawi zia kan hre tawh tih CESJ hian sawiin, ‘Kawng an laihna hmun apiangah leivungin kan luite hna nei an an chhilh bo a, luipuiah siltation a khat a, lui kuang a pawnlang a, lui tui a titlem a, furah tui lian a siam a tih kan tawnhriat tawh atangin, dan bawhchhiaa che te hmachhawn ngam turin ram leilungfate huaisen tawh ang u tiin kan insawm nawn a ni,’ a ti.